ئامېرىكانىڭ سابىق باش ئەلچىسى جاسۇسلۇق جىنايىتى بىلەن  ئەيىبلىنىپ قولغا ئېلىندى

تۈركىيە ئاۋازى رادىيوسى خەۋىرى: ئامېرىكا بىرلەشمە ئاگېنتلىقى (Associated Press) نىڭ زىيارىتىنى قوبۇل قىلغان، ئەمما نام-شەرىپىنى ئاشكارىلاشنى خالىمىغان ئىككى يۇقىرى دەرىجىلىك ئەمەلدار، ئامېرىكا فېدېراتسىيە تەكشۈرۈش ئىدارىسى (FBI) نىڭ ئۇزۇندىن بۇيان كۇباغا قارىتا «جاسۇسلۇققا قارشى تۇرۇش» تەكشۈرۈشى ئېلىپ بېرىۋاتقانلىقىنى بىلدۈردى.

دائىرىلەر ئامېرىكانىڭ بولىۋىيەدە تۇرۇشلۇق باش ئەلچىلىرىدىن بىرى بولغان 73 ياشلىق روچانىڭ تەكشۈرۈش جەريانىدا قولغا ئېلىنغانلىقىنى ئېيتتى.

روچانىڭ ئامېرىكا ئەدلىيە مىنىستىرلىقى تەرىپىدىن «كۇبانىڭ مەنپەئەتىگە خىزمەت قىلىش» بىلەن ئەيىبلەنگەنلىكى ئەسكەرتىلدى.

بىراق، ئامېرىكا ھۆكۈمىتى ھازىرغىچە بۇ ھەقتە ھېچقانداق بايانات ئېلان قىلمىدى.