تۈركىيە ئەسكەرلىرى شەرقىي ئاقدېڭىزدا بىر پاجىئەنىڭ ئالدىنى ئالدى

تۈركىيە ئاۋازى رادىيوسى خەۋىرى: خەۋپسىزلىك تارماقلىرىدىن ئېلىنغان مەلۇماتلارغا ئاساسلانغاندا، لىۋىيە دېڭىز تەۋەلىكىدە ۋەزىپە ئۆتەۋاتقان«ت ج گ غازىئانتەپ» پاراخوتى 13-ماي (2021) خومس پورتىدىن 28 مىل يىراقلىقتا كۆچمەنلەر ئولتۇرغان بىر يەل قولۋاقنى بايقىغان بولۇپ، كۆچمەنلەرنىڭ چوڭ خەتەر ئاستىدا ئىكەنلىكى بىلىنگەندىن كېيىن، پاراخوتتىكى بىر تىك ئۇچار نەق مەيدانغا ئەۋەتىلگەن.

«ت ج گ غازىئانتەپ» پاراخوتى دەرھال لىۋىيە ساھىل بىخەتەرلىك قومانلىق مەزكىرىگە ئەھۋالنى مەلۇمات قىلغان ۋە يەل قولۋاقنىڭ بىخەتەرلىكىنى كاپالەت ئاستىغا ئالغان.

لىۋىيە ساھىل بىخەتەرلىك تارماقلىرى نەق مەيدانغا يېتىپ بېرىپ 97 كۆچمەننى قۇتقۇزۇۋالغان.  شۇنىڭ بىلەن، يۈز بېرىش ئېھتىمالى بولغان پاجىئەنىڭ ئالدى ئېلىنغان.

بىخەتەرلىك تارماقلىرى لىۋىيە دېڭىز تەۋەلىكىدە ۋەزىپە ئۆتەۋاتقان ھەربىي پاراخوتلارنىڭ مۇشۇ ھەپتە ئىچىدە 123 كۆچمەننىڭ قۇتقۇزۇۋېلىنىشىدا مۇھىم رول ئوينىغانلىقىنى ئەسكەرتىپ، تۈركىيە دېڭىز ئارمىيە پاراخوتلىرىنىڭ رايوندا يۈز بېرىش ئېھتىمالى بولغان ئۆلۈم-يېتىم ھادىسىلىرىنىڭ ئالدىنى ئېلىشقا زور تۆھپىلەرنى قوشقانلىقىنى قەيت قىلدى.