بەششار ئەسەد ئىدلىبقا ھۇجۇم قىلىشنى توختاتمىدى

تۈركىيە ئاۋازى رادىيوسى خەۋىرى: بەششار ئەسەد ھاكىمىيىتىنىڭ قىسىملىرىنىڭ «ئىدلىب جىددىيچىلىكنى پەسەيتىش رايونى» چېگراسى ئىچىدىكى ئەبۇ ھاببە ۋە ئەل ھامادانىيە يېزىلىرىغا قىلغان بومباردىماندا يەتتە كىشى جېنىدىن ئايرىلدى.

«سۈرىيە مۇداخىلە كوردىناتسىيەلىرى» ناملىق يەرلىك ئىجتىمائىي تەشكىلاتنىڭ مەلۇماتلىرىغا ئاساسلانغاندا، ھۇجۇم ئەۋجىگە چىققان 9-فېۋرالدىن 6-ئاپرېلغىچە 25 مىڭ 776 ئائىلىدىن 160 مىڭ 583 كىشى ئەتراپتىكى تۇرالغۇ رايونلىرىغا ۋە تۈركىيە چېگرا لىنيەسىدىكى جايلارغا كۆچۈشكە مەجبۇر بولغان. مارت ئېيىدا 135 كىشى جېنىدىن ئايرىلغان.

بەششار ئەسەد قىسىملىرى 2018-يىلى 17-سېنتەبىر تۈركىيە بىلەن رۇسىيە ئوتتۇرىسىدا ئىمزالانغان ئۇرۇش توختىتىش كېلىشىمىگە قارىماي، ھۇجۇملىرىنى داۋاملاشتۇرماقتا. ئاستانا كېلىشىمى بويىچە بەششار ئەسەد ھاكىمىيىتىنىڭ كاپالەتچىسى بولغان رۇسىيەنىڭ ھۇجۇملارنىڭ ئالدىنى ئېلىش مەجبۇرىيىتى بار. قوراللىق ئۆكتىچىلەر 2018-يىلى 17-سېنتەبىر ئىمزالانغان سوچى كېلىشىمىنىڭ تەلىپىگە بىنائەن 2018-يىلى 10-ئۆكتەبىر ئېغىر تىپلىق قوراللىرىنى رايوندىن چېكىندۈرگەن ئىدى.