donald tramp: «xitay peske domilawatidu. shunga zeperge merkezlishish lazim»

türkiye awazi radiyosi xewiri: donald tramp amérika merkez bankisi «Fed» ning bügün bashlinidighan fédératsiye ochuq bazar komitéti «FOMC» ning yighinidin ilgiri ösümning östürülmesliki kéreklikige dair sözlirini dawamlashturdi.

tiwittérdiki xususiy hésabidin élan qilghan bayanatida, «amérika merkez bankisi "Fed" ning  shünche küchlük dollar zapisigha ige turughluq, uning üstige pul paxalliqimu nölde turuwatqan bir weziyette, ösümni östürüshni oyliship yurishige ademning ishengüsi kelmeydu. parizh köyiwatidu. xitay peske domilawatidu. shunga zeperge merkezlishish lazim» dégen sözlerni ishletti.

tramp yéqinqi aylardin buyan amérika merkez bankisi «Fed» ni ösümni östürgenliki sewebidin nurghun qétim tenqid qilghan idi.

bir bayanatida «amérika merkez bankisi "Fed" manga nisbeten eng chong tehdit» dégen söznimu ishletken donald tramp, amérika paychék bazarliridiki éghir töwenleshke bankining jawabkar ikenlikini ilgiri sürgen idi.

donald tramp amérika merkez bankisi «Fed» ning bashliqigha özi teyinligen jérom powéldin memnun emeslikinimu pat - pat tilgha élip kéliwatqan bolup, jérom powélni qoghlap chiqirishni oylashqan yaki oylashmighanliqigha dair bir soalgha qarita: «yaq uni qoghlap chiqarmaymen, peqetla uningdin könglüm yérim» dep jawab bergen idi.

amérika pirézidénti donal tramp 2017 – yanwarda wezipige olturghandin buyan amérika merkez bankisi «Fed» 6 qétim ösümni östürgen bolup, ete axirilishidighan fédératsiye zapisi, ochuq bazar komitéti «FOMC» yighinida, ösümning qayta östürülidighanliqigha qarita bazarlarda %75 yaki %80 chong éhtimalliqi bar, dégen qarash hakim.