bir qisim arakanliq musulman birmagha qayturuétilidu

türkiye awazi radiyosi xewiri: birmadiki irqiy qirghinchiliq tüpeyli bangladéshqa qéchip ketken 5000 arakanliq musulman birmagha qayturuwétilidu.

bangladéshqa  qéchip barghan birmaliq musulmanlarning bir qismini birmagha qayturuwétish üchün, bu yil öktebirning axirida birma bilen bangladésh dairiliri otturisida kélishim tüzüldi.

kélishim dairiside jemiy 5000 birmaliq musulman qayturuwétilidighan bolup, mushu 15-noyabirda deslepki qedemde 2000 ming birmaliq musulman qayturulidiken.

lékin qayturulidighan kishiler tizimlikide ismi bolghan nurghun kishi qaytip kétishni ret qilmaqta.

birma halliq turmush we tereqqiy qildurush ministiri win miyat ayé, deslepki qedemde 2251 ademning déngiz arqiliq qayturulidighanliqini, kéyinki qedemde 2095 ademning quruqluq arqiliq qayturulidighanliqini éytti.

birleshken döletler teshkilati  birmadiki bixeterlik sharaitlirining toluq piship yétilmigenlikini eskertip, birma we bangladésh dairilirini birmaliq musulmanlarni qayturush mesiliside aldirangghuluq qilmasliqqa chaqirdi.

b d t musapirlar aliy komissarliqi yekshenbe küni bayanat bérip, birmaliq musulmanlar birmadiki bixeterlik sharaitidin xatirjem bolalmisa, ulargha bangladéshqa tekrar qaytip kétish hoquqi bérilishi lazimliqini eskertti.

birma hökümiti puqraliq hoquqi bermey kéliwatqan nurghun arakanliq musulman, yillardin buyan bésim  we zulum astida yashighan birmagha qaytip kétishni xalimaydu.

birma hökümiti birmaliq musulmanlargha normal puqraliridin perqliq halda alahide kimlik béridighanliqi, hetta ashliq we qonalghu jay yardem qilidighanliqi toghrisida wede bérip kelmekte.

arakanliq musulmanlar nawada birmada bixeter sharait berpa qilinmay turup birmagha qaytqan teqdirde, ularning yene bir qétim keng kölemlik irqiy qirghinchiliqqa duch kélidighanliqi bildürülmekte.

2017-yili 25-awghusttin kéyin arakanni tashlap bangladéshqa qachqanlarning sani 720minggha yetti.