xitay bilen watikan kélishim imzalidi

türkiye awazi radiyosi xewiri: watikan bilen xitay arisida uzundin buyan mesile bolup kéliwatqan pop teyinlesh mesilisi toghrisida waqitliq kélishim imzalandi.

watikan uchur-alaqe ishxanisi teripidin bu heqte élan qilinghan bayanatta, kélishimning béyjingda watikan döletlerara munasiwetler ministirliqi muawin ministiri antonyo kamiller bilen xitay muawin tashqi ishlar ministiri wang chaw teripidin imzalanghanliqi bildürüldi.

kélishimning qerellik diyalogning netijiside imzalanghanliqi bayanatta, kélishimning peydinpey ijra qilinidighanliqi bildürüldi.

bayanatta mundaq déyildi: «kélishim chérkawning mewjudluqi üchün zörür bolghan popni teyinleshke munasiwetlik bolup, ikki dölet arisida téximu küchlük hemkarliq munasiwiti ornitishni meqset qilidu. her ikki terep mezkur kélishimning ikki dölet munasiwitini kücheytish we xitay xelqining menpeeti we dunya tinchliqi üchün xitaydiki katolik chérkawlirining mejudluqigha paydiliq bolushini arzu qilidu.»

mezkur kélishim arqiliq papaning ruxsiti bolmay turupmu unwangha érishken barliq poplarning papa birlikige qobul qilinghanliqi eskertilgen bayanatta: «papa firankiskus chiqirilghan qararlarning ötmüshtiki mesililerni hel qilish we xitaydiki katoliklarning ittipaqliqigha paydiliq xizmetlerning élip bérilishida rol oynishini arzu qilidu»déyildi.

bu toghruluq bayanat bergen watikan uchur-alaqe ishxanisi mudiri girég burkému mezkur kélishimning ikki  dölet arisidiki diyalogning  xatimesi emes muqeddimisi ikenlikini éytti.

burké mundaq dédi: «kélishimning meqsiti siyasiy bolmastin  belki hem  rim bilen alaqe ichide bolghan hemde xitay dairiliri teripidinmu étirap qilinghan poplargha munasiwetliktur.»

xitay dairiliri memliket ichidiki poplarni özlirining teyinlishi kéreklikini, xitaydiki poplarni watikanning teyinlishining xitayning ichki ishlirigha arilishish bolidighanliqini ilgiri sürüp, watikan dölitining xitaydiki chérkawlargha pop teyinlishini étirap qilmay kéliwatatti.