trampning padishah selmandin pul telep qilghanliqi ilgiri sürüldi

türkiye awazi radiyosi xewiri: amérika pirézidénti donald trampning süriyediki amérika eskerlirini chékindürüp chiqish üchün seudi erebistan padishahi selman bin abdulezizdin iqtisadiy jehettin yardem telep qilghanliqi ilgiri sürüldi.

amérikidiki nopuzluq gézitlerdin bolghan washingiton pochta géziti (WP)ning bu heqtiki xewirige asaslanghanda, tramp bultur dékabirda padishah selman bilen téléfonda körüshkende süriyediki amérika eskerlirini téz sürette chékindürüp chiqish üchün seudi erebistan hökümitidin 4 milyard dollar yardem qilishni telep qilghan.

gézitning ziyaritini qobul qilghan amérikiliq mesullarning bildürüshiche, donald tramp padishah selman we  seudi hökümiti bilen bu mesiliside kélishken.

amérikining seudi erebistandiki elchisi bu mesile toghruluq soralghan soallarni jawabsiz qaldurdi. washingiton pochta géziti aq sarayning amérika we süriyediki yerlik ittipaqdashlirining daéshning changgilidin tartip élinghan rayonlarni qaytidin berpa qilip muqimliq ornitish üchün seudi erebistan we bashqa döletlerdin iqtisadiy yardem telep qilghanliqini xewer qildi.

gézitining bu heqtiki xewirige asaslanghanda, amérikining süriyediki urushtin kéyinki pilani beshshar esed we uning rus we iranliq ittipaqdashlirining süriyediki «azad qilinghan»rayonlarda nopuz tiklishige we daéshning qaytidin bash kötürüshige tosalghu bolushtin ibaret iken.

washingiton pochta géziti amérikining ötken ay süriyede muqimliq berpa  qilish xizmetliri üchün 200 milyon dollar serp qilghanliqini bildürdi.

amérika hökümet emeldarlirining pirézidént donald trampni bolupmu iranning rayondiki nopuz dairisi seweblik amérikining süriyening shimalidiki eskerlirini chékindürmeslik mesiliside qayil qilghanliqlirini bildürgen gézit amérikiliq bir emeldarning munu sözlirige orun ajratti: «pirézidént trampni süriyede qebih bir küchning bash kötüridighanliqi mesiliside qayil qilduq, bu waqitliq bolsimu yaxshi ehwal, biraq tramp we bashqa amérikiliq emeldarlar süriyede amérika eskerlirining dawamliq wezipe ötüshini xalimaydu.»

tramp hakmiyet béshigha kelgendin buyan süriyediki amérika eskerlirining sanini ashurushni qobul qilghan bolsimu lékin amérikining süriyede téximu aktip rol oynishigha hetta dawamliq esker turghuzushigha selbiy pozitsiye bildürüp kéliwatqanliqini eskertken gézit, nöwette amérikining süriyediki asasliq ittipaqdéshi bolghan we y p g teshkilatining yadrosini teshkil qilidighan süriye démokratchilar teshkilati ezalirigha telim-terbiye we meslihet bérish we qollash meqsitide texminen 2000 amérika eskirini rayongha orunlashturghanliqini eslitip ötti.

washingiton pochta gézitining ziyaritini qobul qilghan yene bir amérikiliq emeldar süriye démokratchilar teshkilatining daéshning 400 ezasini tutup turuwatqanliqini bildürüp, chong kamérlarda birlikte yétiwatqan bu térrorchilarning qaytidin teshkillinip mesile peyda qilishidin endishe qilidighanliqini éytti.

amérikiliq emeldar seudi erebistangha oxshash ittipaqdashliridin telep qilinghan pulning bir qismining tutup turuwalghan daéshchilarni ayrim kamérlargha solash üchün serp qilinidighanliqini puritip ötti.

bildürülüshiche, seudi erebistan text warisi shahzade muhemmed bin selman amérikini ziyaret qilish üchün bügün yolgha chiqidiken.