ebu gheyt amérikining elchixanisini quddusqa yötkesh qararigha qarshi bayanat élan qildi
ereb elliri ittipaqi bash katipi ehmed ebu gheyt, amérika qoshma ishtatliri dairilirining israiliyening paytexti tél awiwdiki elchixanisini 14 – mayda quddusqa yötkesh pilanining «ighwager shundaqla xata chiqirilghan bir qarar» ikenlikini eskertti.
türkiye awazi radiyosi xewiri: ereb elliri ittipaqi bash katipi ehmed ebu gheyt, amérikining tél awiwdiki elchixanisini pelestinliklerning nekbe yeni pajie künige we israiliye qurulghanliqining 70 yilliqini xatirilesh künige toghra kélidighan 14 – mayda quddusqa yötkeshni pilanlawatqanliqi toghrisida yazma bayanat élan qildi.
«mezkur qarar, dékabir éyidin buyan chiqirilghan xata qararlar we ighwagerchilik zenjirining yéngi bir halqisi» dégenlerni qeyt qilghan ebu gheyt, bu ehwalning pelestinlikler bilen israiliyeliklerning birlikte yashishigha bolghan axirqi ümidnimu yoqitip tashlash aldida ikenlikini eskertti.
elchixanining pajiening xatire künide yötkilishining «amérika qoshma ishtatlirining israiliye terepdari pozitsiyede ikenlikini we rayonda 70 yildin artuq waqittin buyan dawamlishiwatqan toqunushning tarixi we qurulmisining yaxshi muhakime qilinmighanliqi» ni körsitip bergenlikini qeyt qilghan ebu gheyt, amérikining bu mayilliqi netijiside tinchliq musapisige hamiyliq qilish salahiyitini yoqitip qoyghanliqigha isharet qilip ötti.
amérika tashqi ishlar ministirliqining ismining ashkarilinishini xalimaydighan bir yuqiri derijilik emeldari, elchixanining yötkilishi toghrisida bayanat bérip, «may éyida quddusta amérika qoshma ishtatliri elchixanisining échilishini pilanlawatimiz. elchixanining échilishi israiliye qurulghanliqining 70 – yiligha toghra kelmekte» dégenidi.
israiliye qatnash we dölet bixeterlik ishliri ministiri yisraél katzmu, amérika dairilirining elchixanisini 14 – mayda tél awiwdin quddusqa yötkeshni qarar qilghanliqini élan qilghanidi.
