Erdogan BMG-niň Howpsuzlyk Geňeşinde Özgertme Edilmegini Isledi

Prezident R.T.Erdogan BMG-niň Howpsuzlyk geňşiniň dolanşyk ulgamynda özgertme edilmegi boýunça çagyryşyny gaýtalady.

Erdogan 24-nji oktýabr BMG-niň döredilen gününiň 77 ýyllygy mynasybetli ýüzlenme çap etdi.

Erdogan Türkiýäniň parahatçylyk we howpsuzlyk, adam hukuklary we durnukly galkynyş ugurlarynda BMG-niň çäginde alynyp barylýan işlere anyk goşantlar goşýan hem-de öňbaşçy pozisiýalary eýeleýän ýurtlardan biridigini beýan etdi.

BMG-niň býujetine artykmaç goşant goşýan ilkinji 20 ýurtdan biri bolmagyň ýany bilen, Stambulyň BMG-niň merkezine öwrülmegi boýunça alynyp barylýan işleriň çäginde BMG-niň düzümleriniň hem-de gulluklarynyň sebitleýin merkezlerine hem-de Stambulda ýer eýeçiligini edýändiklerini ýatladan Erdogan; “BMG-niň Baş sekretary Hormatly Antoniu Guterriş bilen bilelikde edýän ýokary tagallalarymyzyň ntijesinde ukrain gallasynyň Gara deňiziň üstaşyr dünýä ýurtlaryna ýetirilmegine öňbaşçylyk etdik. Stambul ylalaşygynyň çäginde şu günki güne çenli 8 million tonnadan gowrak gallanyň we beýleki önümleriň eksportuny amala aşyrdyk. Onuň bökdençsiz dowam etmegi üçin diplomatik gatnaşyklarymyzy ýokary depginde alyp barýarys” diýdi.

Erdogan global parahatçylyga we asudalyga wehim salýan yslam duşmançylygyna we medeni rasizme garşy göreş boýunça wagyz ediş işlerini alyp barýandyklaryny, 15-nji martyň BMG-niň Baş Assambleýasy tarapyndan Yslamafobiýa garşy göreşmegiň halkara güni diýip yglan edilmegine hem öňbaşçylyk edip, bu ugurda başlangyç edendiklerini nygtady.

“Duşmançylyk garaýyşynyň parahatçylyga zyýan ýetirmezligi üçin hem BMG-niň çäklerinde hem-de özara formatda tagallalarymyzy dowam etdireris. Günde müňlerçe bigünä adamyň pida bolmagyna sebäp bolýan pajygalaryň ortadan aýrylmagynda we durnukly galkynyşyň üpjün edilmeginde BMG-niň pozisiýasynyň hasam güýçlendirilmegi möhümdir. Onuň ýoly bolsa BMG-niň Howpsuzlyk geňeşiniň wekilçilikde adalatlylyk kadasyna görä özgerdilmeginden geçýär. Demokratik, aç-açan, netijeli we hasabata açyk Howpsuzlyk geňeşi halkara jemgyýetçiliginiň tamasyny ödär. Agza ýurtlaryň ählisiniň deň derejede wekilçilik edilmegini we halkara jemgyýetçiliginiň ygtyýaryna laýyk hereket edýän BMG-niň Baş Assambleýasy hem güýçlendirilmeli. Türkiýe BMG-niň, BMG-niň eýe bolan gymmatlyklarynyň we BMG-niň alyp barýan işleriniň güýçli goldaýyjysy bolmaga dowam eder. Ine şu garaýyşlar bilen ýurdumyzyň hem esaslandyryjylaryndan biri bolan BMG-niň döredilen gününiň 77 ýyllygyny gutlap, BMG-niň işleriniň global parahatçylyga, durnuklylyga we asudalyga goşant goşmagyny arzuw edýärin” diýdi.