“ABŞ we Russiýa bilen gazanylan ylalaşyklar syýasy üstünlik hökmünde taryha geçdi”
Türkiýäniň Daşary işler ministri Mewlüt Çawuşogly, Türkiýäniň ABŞ we Russiýa bilen Siriýa babatynda gazanan ylalaşyklarynyň syýasy üstünlik hökmünde taryha geçendigini belledi
Mewlüt Çawuşogly, Anadoly habarlar agentligine, Türkiýe bilen Russiýanyň düýn Soçide gazanan ylalaşygynyň jikme-jikligi bilen bagly beýanat berdi.
Çawuşogly, Türkiýäniň ABŞ we Russiýa bilen Siriýa babatynda gazanan ylalaşyklarynyň syýasy üstünlik hökmünde taryha geçendigini nygtady.
Dünýäniň iň uly döwletiniň Parahatçylyk Çeşmesi operasiýasynyň kanunydygyny kabul edendigini aýdan Çawuşogly: “Parahatçylyk çeşmesi operasiýasynda islendik terrorçy öňümize çyksa olary täsirsiz ýagdaýa getireris” diýip habar berdi.
Ekstremist terror guramasy ÝPG/PKK-a agza terrorçylaryň Kamyşly bilen birlikde Türkiýäniň serhedinden 30 km günorta tarap çykaryljakdygyny aýdan Çawuşogly, Türkiýäniň eden tagallalary bilen terrorçylaryň Siriýanyň demirgazygynda döretmek islän terror döwletiniň öňüniň alynandygyny mälim etdi.
Parahatçylyk Çeşmesi operasiýasynyň Siriýanyň gelejegi üçin öwrülişik nokady bolandygyny aýdan Çawuşogly: “Bu ýerlerde ilatyň aglabasy arap. Dolanşygyň başynda araplar bolar. Kürtler bar bolsa olar hem dolanşykda bolar” diýip aýan etdi.
