Türk metbugatynyň gysgaça mazmuny
Ýurduň we dünýäniň gün tertibiniň ileri tutulýan ugurlary bilen bagly habarlar gündelik gazetlerde giň beýan tapýar.
“Watan” gazeti “Türkiýe Şweýsariýa PKK sebäpli reaksiýa bildirdi” söz başyly habarynda, Daşary işler ministrliginiň Şweýsariýada terror guramasy PKK/ÝPG bilen arabaglanşykly bikanun “Demirgazyk we Gündogar Siriýa Awtanom Dolanşygynyň Wekilhanasy” ady bilen wekilhananyň açylmagyna berk reaksiýa bildirendigini ýazýar. Şweýsariýanyň Türkiýedäki İlçihanasynyň Geňeşçi işçisiniň ministrlige çagyrylyp protest edildi we düşündiriş bermegi soraldy.
“Star” gazeti “Gresiýadan Türkiýä sagbolsun” söz başyly habarynda, Gresiýanyň Daşary işler ministri Nikos Dendiasyň dowam edýän tokaý ýangynlaryna 2 ýangyn söndüriji uçar bilen goldaw berilmegi mynasybetli kärdeşi Mewlüt Çawuşogluna sagbolsun aýdandygyny mälim edýär.
“Ýeni Şafak” gazeti “Stambul howa menzili “Dünýäniň iň gowularyndan biri” söz başyly habarynda, uçar gatnawlaryny öwreniji Skýtrax” firmasynyň 2021-njji ýyla degişli “Dünýäniň iň gowy howa menzilleri” sanawyny çap edendigini okyjy köpçüliginiň dykgatyna ýetirýär. Sanawa laýyklykda 2020-nji ýylda 102-nji orny eýelän Stambul howa menziliniň şu ýyl 85 basgançak ýokarlap, dünýäniň iň amatly 17-nji howa menzili bolandygyny ýazýar.
“Sabah” gazeti “Antalýa 7 aýda 3,396 000 syýahatçy kabul etdi” söz başyly habarynda, dünýäniň esasy söwda merkezlerinden biri bolan we koronawirus pandemiýasynda saglyk taýdan howpsyz dynç alyş mümkinçiligi hödürlän Antalýa 7 aýda 3,396 000 syýahatçynyň gelendigini mälim edýär. Russiýa 1,127,716 syýahatçy bilen Antalýany saýlap alanlaryň hatarynda birinji orny eýeleýär.
