Türk metbugatynyň gysgaça mazmuny
Ýurduň we dünýäniň gün tertibiniň ileri tutulýan ugurlary bilen bagly habarlar gündelik gazetlerde giň beýan tapýar
“Sabah” gazeti “Erdogan Eýranyň Prezidenti bilen telefon arkaly söhbetdeşlik geçirdi” söz başyly habarynda, Prezident R.T.Erdoganyň Eýranyň döwlet Ýolbaşçysy Hasan Ruhani bilen telefon arkaly söhbetdeşlik geçirendigini ýazýar. Habarda Kommunikasiýalar edarasyndan berilen beýannama görä Türkiýe-Eýran gatnaşyklarynyň ösdürilmegi we terrorçylyga garşy göreşiň güýçlendirilmegi hakynda pikir alyşylan telefon söhbetdeşliginde, Azerbaýjan-Ermenistan we Siriýa meselesiniň başda durmagynda sebitleýin meseleleriň seljerilendigi mälim edilýär.
“Hürriýet” gazeti “Ministr Akar möhüm beýannama berdi” söz başyly habarynda, Milli Goranmak ministri Hulusi Akaryň Ankaranyň Polatly etrabyndaky General Nahit Şenogly Atyş we türgenleşik zolagynda geçirilen “Atyş Erkin-2020” türgenleşiginde sözlän sözünde Egeý we Gündogar Ortaýer deňizindäki wakalar hakynda “Biz goňşularymyzy, halkara guramalaryny dialoga çagyrýarys. Geliň gepleşik geçireliň, pikir alyşalyň, hukuk kadalaryna laýyklykda meseläni çözeliň. Biziň islegimiz şundan ybarat. Mundan başga akyla, pikire, hukuga bap gelmeýän, esasanda üçünji taraplaryň ýerliksiz käbir düzgünleri girizmäge synanşmagy ýa-da şol düzgünleriň biz tarapyndan kabul edilmegine garaşmaklary netijesiz tagalladyr” diýen sözlerini okyjy köpçüliginiň dykgatyna ýetirýär.
“Star” gazeti “Türk ýaragly güýçleri “Atyş Erkin-2020” türgenleşigini geçirdi” söz başyly habarynda, “Atyş Erkin-2020” türgenleşiginde ähli nyşanalaryň gyşarnyksyz we doly derbi dagyn edilendigini, türgenleşikde milli şertlerde öndürilen “Fyrtyna gaubisalarynyň”, “Korkut” howa goranyş ulgamlarynyň, milli pyýada goşun tüpeňi bilen bilelikde harby enjamlaryn nyşanalary gyşarnyksyz ýok edendigine ünsleri çekýär.
“Ýeni Şafak” gazeti “Miniatura bomba synagdan üstünlik bilen geçdi” söz başyly habarynda, Milli Goranmak ministrliginiň “Miniatura bomba” taslamasynyň çäginde 401-nji Synag flot serkerdeligi tarapyndan berk nyşanalara garşy böwsüji uç bilen geçirilen hüjüm synagynyň üstünlik bilen berjaý edilendigini ýazýar.
“Haber Türk” gazeti “TİKA front liniýasyndaky azerbaýjan halkyna azyk kömegini ugratdy” söz başyly habarynda, Türk İş Hyzmatdaşlygy we Utgaşdyryjy Agentligi TİKA-nyň front liniýasyna ýakyn etraplarda ýaşaýan we Ermenistanyň hüjümlerinde ýitgi çeken azerbaýjanlylara 40 tonna azyk kömegini ugradandygyny mälim edýär.
