Türk metbugatynyň gysgaça mazmuny
Dünýäniň we ýurduň gün tertibiniň ileri tutulýan ugurlary bilen bagly habarlar gündelik gazetlerde giň beýan tapýar
Haber Türk gazedi: “Prezident Erdogan, Makron, Merkel we Jonson bilen söhbetdeş boldy” söz başyly habarynda, Türkiýäniň Prezidenti Rejep Taýýip Erdoganyň, Fransiýanyň Prezidenti Emmanuel Makron, Germaniýanyň Federal Kansleri Angela Merkel we Britaniýanyň Premýer ministri Boris Jonson bilen göni aragatnaşyk arkaly wideoşekilli söhbetdeş bolandygyny habar berýär. Göni aragatnaşyk arkaly wideoşekilli geçen maslahatda koronawirusa garşy göreş bilen birlikde Siriýa krizisi, bosgun meselesi we Liwiýadaky soňky hadysalar ara alynyp maslahatlaşyldy.
Sabah gazedi: “Türkiýe ýene-de 6 ýurda uçuş gadagançylygyny girizdi” söz başyly habarynda, Türkiýe koronawirusa garşy göreş maksady bilen çäre görmäge dowam edýändigini belleýär. Britaniýa, Irlandiýa, Şweýsariýa, Saud Arabystany, Müsür we BAE ýaly ýurtlarada uçuş gadagançylygy girizildi. Şeýlelik bilen Türkiýäniň syýahatçylyk gadagançylygyna girizen ýurtlarynyň sany 20-ä ýetdi.
Hürriýet gazedi: “Koronawirus bütin dünýä ýaramaz täsir ýetirýän mahaly, maslahat berilen ýurt ýene-de Türkiýe boldy” söz başyly habarynda, Russiýanyň Tur operatorlar bileleşiginiň (ATOR), täze görnüş koronawirus howpy taýdan syýahat edip boljak ýurtlaryň arasynda ýene-de Türkiýäni saýlandygyny habar berýär. ATOR birnäçe wagt ozal beren beýanatynda, rus syýahatçylaryň koronawirus epidemiýasy sebäpli dynç alyş meýilnmalary boýunça Türkiýäni saýlamaga başlandygyny mälim edipdi.
Star gazedi: “Türk kärhanasy Hytaýyň farmasewtika kärhanasy bilen koronawirusa garşy sanjym babatynda ylalaşdy” söz başyly habarynda, Türk alymy Prof.Dr. Ugur Şahin tarapyndan esaslandyrylan biotehnologiýa kärhanasy BioNTech-iň, täze görnüş koronawirus epidemiýasyna garşy sanjym babatynda merkezi Hytaýda ýerleşýän Shanghai Fosun Pharma kärhanasy bilen hyzmatdaşlyk şertnamasyna gol çekişendigini okyjy köpçüliginiň dykgatyna ýetirýär. Iki kärhana sanjymyň oýlanyp tapylmagy, kliniki şertlerde synagdan geçirilmegi we bilelikde satmak babatynda hyzmatdaşlyk ederler.
Ýeni Şafak gazedi: “Türkiýäniň tebigy gaz çykdajysy 3 milliard dollar azalar” söz başyly habarynda, Nebitiň bahasynyň ýylyň ahyryna çenli 50 dollardan aşakda bolmagy bilen Türkiýäniň 2020-nji ýyldaky tebigy gaz çykdajysynyň 3 milliard dollar azaljakdygyny aýan edýär.
