Türk metbugatynyň gysgaça mazmuny
Dünýäniň we ýurduň gün tertibiniň ileri tutulýan ugurlary bilen bagly habarlar gündelik gazetlerde giň beýan tapýar
“Hürriýet” gazeti “ABŞ bilen Eýrany parasatlylyga çagyrdy” söz başyly habarynda, Prezident R.T.Erdoganyň ABŞ-nyň eýranly general Kasym Süleýmanini öldürmeği sebäpli ýüze çykan dartgynlygyň gowşadylmalydygyny belläp, parasatlylyga çagyrandygyny ýazýar. Gazet Erdoganyň düýn agşam gatnaşan telegepleşiginde “Taraplaryň ählisine zyýan ýetirjek sepgide ýetilmänkä dartgynlyga gözegçilik edilmeli” diýen sözlerine ünsleri çekýär.
“Sabah” gazeti “Çawuşogly katarly kardeşi bilen telefon arkaly söhbetdeşlik geçirdi” söz başyly habarynda, Daşary işler ministri Mewlüt Çawuşoglunyň Kataryň Daşary işler ministri Şeýh Muhammed bin Abdurrahman Ali Sani bilen geçiren telefon arkaly söhbetdeşliginde Eýranyň Ynkylap goragçylary goşunynyň İýerusalim güýjüniň serkerdesi general Kasym Süleýmaniniň öldürilmeginden soňky wakalar hakynda pikir alyşandygyny mälim edýär.
“Watan” gazeti “Daşary işler ministrligi: “Berk ýargarýarys” söz başyly habarynda, Türkiýäniň Liwiýanyň paýtagty Tripolide Haftara degişli güýçleriň Harby mektebe guran hüjümini ýazgarandygyny ýazýar. Habarda Daşary işler ministrliginden berilen beýannamada: “Tripolidäki harby mektebe guralan hüjümi berk ýazgarýarys. Hüjümde ýogalan liwiýaly doğanlarymyza alladan rehnet, ýaralylara gyssagly şypa dileýäris” diýilýändigini okyjy köpçüliginiň dykgatyna ýetirýär.
“Star” gazeti “Milli goranmak ministrligi: “Siriýadan gaçan 2 terrorçy boýun egdi” söz başyly habarynda, Siriýadaky düşgelerden gaçan 2 sany PKK/ÝPG terrorçysynyň Şanlyurfanyň Suruç etrabyndaky serhet galasyna gelip, boýun egendiklerini ýazýar. Gazet düýn Milli goranmak ministrliginden berilen beýannamada terror guramasy PKK-dan gaçyşlaryň dowam edýändigi nygtalyp: “Siriýadaky düşelgelerden gaçan 2 sany PKK/ÝPG terrorçysy Suruçdaky serhet galamyza gelip, boýun eğdiler” diýilýändigine ünsleri çekýär.
“Ýeni Şafak” gazeti “Edirnä gelýän bolgar we grek syýahatçylar 270 million ýewro girdeji getirdi” söz başyly habarynda, Edirnä geçen ýyl söwda etmek üçin 2,7 million bolgar we grek syýahatçysynyň gelendigini mälim edýär. Habarda Edirne Söwda we senagat birleşmesinin Başlygy Rejep Zypkynkurdyň 2019-njy ýylyň Edirne üçin diýsen netijeli geçendigini belläp: “270 million ýewro ýurduň ykdysadyýetine goşant goşdy. Şu ýylky maksadymyz 5 millin grek-bolgar syýahatçysyny kabul etmek” diýen sözlerine orun berilýär.
