Türk metbugatynyň gysgaça mazmuny
Dünýäniň we ýurduň gün tertibiniň ileri tutulýan ugurlary bilen bagly habarlar gündelik gazetlerde giň beýan tapýar
“Hürriýet” gazeti “Owganystan bilen bagly taraplary duşuşdyran ýeke-täk platforma Stambul” söz başyly habarynda, Prezident R.T.Erdoganyň Aziýada sebitleýin hyzmatdaşlygyň we arkalaşygyň möhümdigini beýan edendigini ýazýar. Gazet Owganystandan Euranyň we Türkiýäniň üstaşyr Ýewropa uly bosgun akymynyn bardygyny aýdan Erdoganyň, Owganystany ünsden düşürmegiň öwezi dolunmasyz meseleleri ýüze çykarjakdygyny aýdandygyna ünsleri çekýär. Habarda Prezident Erdoganyň: “Başdan geçirilen her bir tapgyrda Owganystan ähli taraplaýyn goldanmaly. “Aziýanyň ýüregi-Stambul” tapgyry Owganystan bilen bagly tarplary duşuşdyran ýeke-täk platforma” diýen sözleri ýerleşdirilýär.
“Ýeni Şafak” gazeti “Yslamy kemsidýän Makron ýurdundaky protestlerem durzup bilenok” söz başyly habarynda, Prezident R.T.Erdoganyň yslam dini bilen terrorizmi ýanaşdyrmaga tagalla edýän Fransiýanyň Prezident Emmanuel Makrona reaksiýa bildirendigini ýazýar. Gazet yslam sözüniň manysyny düşündiren Erdoganyň “Makrona parahatçylyk bilen terrorizmi nähili baglanşdyrýaň” diýip soranymyzda, dymýar” diýen sözlerini okyjy köpçüliginiň dykgatyna ýetirýär.
“Haber Türk” gazeti “Türkiýe gündogar Ortaýer deňizde ýene-de 5 guýy açar” söz başyly habarynda, Prezidentiň orunbasary Fuat Oktaýyň Gündogar Ortaýer deňzinde nebit we tebigy gaz gözleg işlerinde işjeň strategiýa alyp barýandyklaryny nygtap: “Milli gämilerimiz bilen ýene-de 5 guýy açarys” diýendigini ýazýar. Oktaý Türkiýäniň Gündogar Ortaýer deňzinde we Kiprdäki hukuklarymyzdan hem-de bähbitler boýunça egilşik edilmejekdikdigini aýtdy.
“Star” gazeti “Günbatar ýurtlaryna kyn sorag: “ÝPG Siriýada öz işi bilen gümra bolsa, Türkiýä uzaýan tuneller näme?” söz başyly habarynda, Amerikan “CNN İnternational” teleýaýlymynda Kristin Amanpur bilen söhbetdeşlik geçiren Prezidentiň geňeşçisi Prof.Dr. Gülnur Aýbetiň ÝPG-niň NATO-nyň agzalary tarapyndan terror guramasy hökmünde ykrar edilmezligine reaksiýa bildirip: “Diňe Siriýanyň demirgazygyndaky zolaklardan birine guran operasiýamyzda 465 tuneli ýapdyk. Bular Siriýadan ýurdumyza uzaýan tüneller” diýen sözlerine ünsi çekýär.
“Sabah” gazeti “Kappadokiýa rekord syýahatçy sanyna ýetdi” söz başyly habarynda, Türkiýäniň tebigy piramidalary we deňsiz gözellige eýe bolan jülgeleri, howa şarlary, ýerasty şäherleri bilen meşhur syýahatçylyk merkezi Kappadokiýada ýerleşýän muzeýlere ýylyň 11 aýynda 3,6 million adamyň baryp görendigini mälim edýar.
