Türk metbugatynyň gysgaça mazmuny
Dünýäniň we ýurduň gün tertibiniň ileri tutulýan ugurlary bilen bagly habarlar gündelik gazetlerde giň beýan tapýar
Sabah gazedi: “Erdogan Tramp bilen telefon arkaly söhbetdeş boldy” söz başyly habarynda, Türkiýäniň Prezidenti Rejep Taýýip Erdoganyň, ABŞ-nyň Prezidenti Donald Tramp bilen telefon arkaly söhbetdeş bolandygyny mälim edýär. Beýanatda, Erdoganyň Fransiýada geçirilen G7 maslahatynda, Eýran meselesi boýunça edilen ädimler bilen ABŞ-nyň Türkiýedäki Adatdan daşary we doly ygtyýarly ilçisi Dewid Satterfildiň wezipä başlamagyna hoşaldygyny söhbetdeşi bilen paýlaşandygy habar berildi. Iki lideriň söwda kuwwadynyň 100 milliard dollar derejä ýetirilmegi babatynda tutanýerlidiklerini tassyklandyklary aýdylýan beýanatda, mundan başgada Başar Asada tabynlykdaky güýçleriniň hüjümleriniň dowam edýän ýeri bolan Siriýanyň Idlib şäherinde asuda ilatyň goralmagy we täze adamzat krizisileriniň öňüniň alynmagy maksady bilen hyzmatdaşlygyň dowam etdirilmelidigi bellenip geçildi.
Hürriýet gazedi: “ABŞ-nyň ilçisi Erdogana ynanç hatyny gowşurdy” söz başyly habarynda, Türkiýäniň Prezidenti Rejep Taýýip Erdoganyň, düýn Prezident kompleksinde ABŞ-nyň Türkiýedäki Adatdan daşary we doly ygtyýarly ilçisi Dewid Satterfildi kabul edendigini beyan edýär. Dewid Satterfild kabul edilşikde Prezident Erdogana ynanç hatyny gowşurdy. Şeýlelik bilen 22 aý arakesmeden soň ABŞ-nyň Ankaradaky ilçisi wezipesine başlady.
Watan gazedi: “Yrak-Türkiýe arasynda täze nebit geçiriji liniýasy gün tertibinde” söz başyly habarynda, Türkiýäniň Energetika we tebigy serişdeler ministri Fatih Dönmeziň, düýn Yragyň Nebit ministri Samir El-Gadban bilen birnäçe täze taslamany ara alyp maslahatlaşmaga mümkinçilik tapandygyny belläp: “Yrak-Türkiýe nebit geçiriji turba taslamasy diňe Yragyň demirgazygyndaky nebiti däl, eýsem, ýurdyň beýleki sebitlerinde çykarylýan nebitiň hem daşary ýurt bazarlaryna ýetirilmegi taýdan möhüm. Täze taslamalary orta atdylar, biz hem öz gezegimizde bulary uly hoşallyk bilen kabul etdik” diýip nygtady.
Star gazedi: “Ykdysady ynam indeksi artdy” söz başyly habarynda, Ykdysady ynam indeksi awgust aýynda geçen aý bilen deňeşdirilende 7,9 göterim artyp, 80.7-den 87,1 göterime ýetendigini habar berýär. Türkiýäniň Hasabat guramasy awgust aýynyň ykdysady ynam indeksi hakyndaky görkezijilerine görä, ykdysady ynam indeksi awgust aýynda iýul bilen deňeşdirilende 7,9 göterim artyp 87,1 göterime ýetdi. Ykdysady ynam indeksiniň artmagynda sarp ediji, önümçilik, hyzmat we gurluşyk pudaklaryndaky artyş esasy orun eýeledi.
Ýeni Şafak gazedi: “Taryhy 2 müň 700 ýyl ozala degişli: Ilkinji gezek Wanda ulanylypdyr” söz başyly habarynda, Urartu medeniýetiniň iň ajaýyp eserleriniň biri bolan Aýanis galasynda geçirilýän gazuw-agtaryş işleriniň netijesinde 2 müň 700 ýyl ozal ulanylan Anadolynyň ilkinji sintetik boýagyň tapylandygyny aýan edýär. Gazuw-agtaryş işleriniň ýolbaşçysy Mehmet Yşykly, uly mukdarda gök reňkli boýag tapandyklaryny habar berdi.
