Türk metbugatynyň gysgaça mazmuny
Dünýäniň we ýurduň gün tertibiniň ileri tutulýan ugurlary bilen bagly habarlar gündelik gazetlerde giň beýan tapýar
Ýeni Şafak gazedi: “Gündogar Ortaýer deňizinde türgenleşik” söz başyly habarynda, Türkiýäniň Ýaragly güýçleriniň DKTR bilen bilelikde geçirýän Gözleg we halas ediş türgenleşiginiň başlandygyny habar berýär. Penşenbe güni tamamlanjak türgenleşikde Kipr türk güýji, Gündogar Ortaýer deňizinde öz başarnyklaryny görkezer. Türgenleşikde Türkiýäniň sebitdäki hukuklarynyň we bähbitleriniň goramak boýunça islendik mahal taýýardygy ýene-de bir gezek nygtalyp geçiler.
Hürriýet gazedi: “Baltika we halkara deňizçilik geňeşi BIMCO guramasynyň ýolbaşçylygyna türk zenan bellendi” söz başyly habarynda, Prezident Rejep Taýýip Erdoganyň aýaly Emine Erdoganyň, Şadan Kaptanoglynyň BIMCO guramasynyň ilkinji zenan başlygy bolmagyndan bagtyýardygyny aýdandygyny beýan edýär. Stambulda Daşky gurşaw we şäher gurluşyk ministrligi tarapyndan gurnalan çäreleriň birine gatnaşan Emine Erdogan: “Baltika we halkara deňizçilik geňeşi BIMCO guramasynyň başlyklygyna bir türk zenanyň bellenmegi ählimiz üçin buýsançdyr. Düşümli bolsun” diýip belledi.
Haber Türk gazedi: “Lukmançylygyň abraýly sylagy Politzer baýragyny Dr. Emre Ojak aldy” söz başyly habarynda, eşidiş ukybyny ýitirmek we gulak çyňlamak ýaly gulak näsazlyklary başda bolmak bilen standartlary kesgitleýän bir gurama bolan Politzer jemgyýetiniň, dünýä derejesinde gulak keselleri derňewleri taýdan iň abraýly sylag bolan Politzer baýragyny şu ýyl Ankara uniwersitetiniň Gulak, burun we bogaz we Kelle çanak boýun hirurgiýasy bölüminden Dr Emre Ojaka berendigini mälim edýär. Emre Ojak “Içerki gulaga nanobölekler ýoly bilen derman ibermek” atly işi bilen sylaga laýyk görüldi.
Star gazedi: “Türk howaýollary uçarman bolmak isleýän adamlaryň garaşan bildirişini çap etdi” söz başyly habarynda, Stambul howa menzili bilen birlikde uçarlarynyň we uçýan nokatlarynyň sanynyň artjak Türk howaýollary kärhanasynyň uçarman ýetişdirmegi çaltlandyrandygyny okyjy köpçüliginiň dykgatyna ýetirýär. Türk howaýollary uçarman bolmak isleýän müňlerçe ýokary bilimli ýaşlaryň eýýäm ençeme wagt bäri garaşýan we azyndan orta hünär okuwyny tamamlan ýaşlaryň ýüz tutyp biljek uçarman dalaşgärleri bilen bagly bildirişini çap etdi. Bildiriş 2019-njy ýylyň 29-njy awgust sagat 15:00-a çenli galar.
Watan gazedi: “Britaniýanyň Şa maşgalasynyň saçagyna Inegöl çereşnýasy” söz başyly habarynda, Bursa welaýatynyň Inegöl etrabynda ýetişdirilýän Napalýon çereşnýasynyň ýetişmäge başlandygyny, şu ýyl 3 müň tonna çereşnýanyň Britaniýa, Russiýa, Germaniýa we Ukraina eksport ediljekdigini beýan edýär. Inegöl çereşnýasy Britaniýanyň Şa maşgalasyna hem iberildi. Geçen ýyl Inegöl etrabyndan 800 tonna çereşnýa eksport edilipdi.
