Türk metbugatynyň gysgaça mazmuny 19.06.2015

“Ýeni Şafak” gazeti: “Demokratiýa sözüni indi ulanmaň” söz başyly habarynda Türkiýäniň Prezidenti R.T Erdoganyğ Müsürde harby agdarylyşyk arkaly wezipesinden çetleşdiilen ýurduň ozalky Prezidenti Mursa berilen ölüm jezasyna garşylyk görkezendigini okyjy köpçüliginiň dykgatyna ýetirýär. Gazet Erdoganyň söweşlerde wepat bolan adamlaryň ýakynlaryna we weteranlara berilen oraz aýynyň ilkinji agzaçarynda eden çykyşynda: “Mursini wezipesinden çetleşdiren hökümeti goldaýan hiç kimiň mundan beýläk demokrtaiýa, azatlyk, adalat sözlerini ulanmasyn. Biz adalatsyzlygyň we nähaklygyň garşysynda, adalatyň tarapdary bolmagymyzy dowam etdireris” diýendigi bellenýär.

“Haber Türk” gazeti: “Dymmaklygňyz Ýewropa erbet netijeler getirer” söz başyly habarynda, ÝB ministri we Türkiýäniň adyndan ÝB boýunça gepleşikleri alyp baryjy Wolkan Bozkyryň Gumanitar goldaw we krizis dolanşygyndan jogapkär ÝB komisary Hristos Stilianidese we Ýewropa goňşuçylyk syýasaty we giňelme gepleşiklerinden jogapkär ÝB komisary Ýohannes Hahna Türkiýäniň Siriýa serhedinde bolup geçýän wakalar we bosgun meselesi bilen baglanşykly her birine aýratyn hat ugradandygyny mälim edýär. Gazet Bozkyryň olara ugradan hatynda: “Türkiýede 25 çadyr şäherçede 260 müň siriýaly bosgun, çadyr şäherçeleriniň daşynda bolsa 2 million siriýaly we yrakly bosgunlar ýaşaýar. Türkiýe bu ýagdaýlaryň çözülmegi üçin häzirki wagta çenli 6 milliard dollar sarp etdi. Siriýadan gelýän howplary we bosgunlary diňe Türkiýäniň öz boýnuna almagyna garaşmak hem mümkin däl, hem adalatly däl. Halkara guramalaryň meseleler bilen baglanşykly çäre görmeýändigi sebäpli, sebit we Ýewropa ýurtlaryna hem erbet netijeler getirer” diýip ýazandygyna ünsi çekýär.

“Star” gazeti: “Sergileriň iň şüweleňlisi “ATRAX 2015” dekabr aýynda geçiriler” söz başyly habarynda, Türkiýäniň ilkinji güýmenje merkezi “ATRAX”-yň 4-nji gezek geçiriljekdigini habar berýär. Gazet dekabr aýynyň 3-5-i aralygynda geçiriljek “ATRAX”-yň güýmenje pudagynyň ussatlaryny bir ýere jemlejekdigini nygtaýar. Habarda serginiň Türkiýe bilen birlikde güýmenje sergileriniň geçirilýän ýerleri bolan Ýakyn Gündogarda, Balkan ýurtlarynda, Kawkaz ýurtlarynda, Afrikada, Russiýada, Türki dilli ýurtlarda we Ýewropa ýurtlarynda şol pudakda iş alyp barýan hünärmenlere we maýdarlara ýol görkezjekdigi ýazylýar.

“Milliýet” gazeti: “Belgiýanyň waflisine Sakarýadan bäsdeş çykdy” söz başyly habarynda, “Elwan Grubu” kärhanasynyň 30 million dollar möçberinde maýa goýup, Sakarýada wafli öndürjek 3 desga gurandygyny okyjy köpçüliginiň dykgatyna ýetirýär. Habarda “Elwan Grubu” kärhanasynyň başlygy Hidaýet Kadiroglynyň: “Waflimizi Tudeý Waffle markasy bilen öndürýäris. Gollandiýada we Belgiýada öndürilýän karamel waflisini Türkiýede ilkinji bolup biz öndürmäge başladyk” diýendigi ýazylýar.

“Hürriýet” gazeti: “Jessie J ikinji gezek gelýär” söz başyly habarynda, tanymal pop aýdymçy Jessie J-ýiň türk muşdaklary bilen duşuşmak üçin taýarlyk görýändigini mälim edýär. Gazet 2-nji gezek Türkiýä geljek aýdymçynyň 3-nji iýulda Stambulda çykyş etjekdigini belleýär.