Türk metbugatynyň gysgaça mazmuny 25.12.2014
Dünýäniň we ýurduň gün tertibiniň ileri tutulýan ugurlary bilen bagly habarlar gündelik gazetlerde giň beýan tapýar
“Ýeni Şafak” gazeti “Eýranyň metrosyny türkler gurar” söz başyly habarynda, günbataryň uzak ýyllardan bäri dowam edýän embargosy sebäpli uly kynçylyk çekýän Eýranda häkimiýet başyna geçen Prezident Hasan Ruhaniden soň täze döwrüň başlandygy mälim edilýär. Gazet, global arenada ykdysady hyzmatdaşlygy ösdürmek isleýän resmi Tähranyň esasy taslamalary Türkiýe bilen bilelikde durmuşa geçirýändigini, 1300 kilometr uzynlygyndaky awtomagistral taslamasyndan soň Eýranyň indi Töwriziň metrosynyň gurluşyny türklere tabşyrandygyny ýazýar.
“Akşam” gazeti “Nýu-Ýork we Mekge künjüli halka çörek bilen tanyşdy” söz başyly habarynda, geçen aýyň dowamynda-da Nýu-Ýorkda dükan açyp künjüli halka çöregi amerikalylara tanyşdyran “Simitr Köşküniň” Ýewropadaky we Amerikadaky ösüşini dowam etdirýändigini nygrtaýar. Gazet firmanyň gysga möhletde Londonda we Parižde dükan açjakdygyny okyjy köpçüliginiň dykgatyna ýetirýär. Habarda Türkiýede we daşary ýurtlarda 14 ýurtda 300-e golaý dükanda aýda 650 müň adama hyzmat edýän “Simit Saraýynyň” 2015-nji ýylyň ahyrynda Amerikadaky dükanlarynyň sanyny 10-a ýetirjekdigi mälim edilýär.
“Star” gazeti “Organiki ekerançylyk eksportynda 400 million dollara ýetildi” söz başyly habarynda, organiki önümlere bolan islegiň ýokarlamagy sebäpli Türkiýäniň pudak boýunça eksportynyň hem artandygy, 1992-nji ýylda diňe 92 görnüşli organiki önüm öndüren Türkiýede şol sanyň 213-e ýetendigi, eksport pudagynyň bolsa 400 million dolara barabardygy nygtalýar.
“Milliýet” gazeti “1 milliard lira yzyna alynmasyz kömek beriler” söz başyly habarynda, transport, deňizçilik we aragatnaşyk ministri Lütfü Elwanyň maglumatlar tehnologiýasy pudagyna taýarlanjak ylmy-kämilleşdiriş taslamalaryna jemi 1 milliard liralyk serişde beriljekdigini aýdandygyny ýazýar. Habarda ministr Elwanyň şol serişdäniň awiasiýa we kosmos pudagy bilen birlikde ähli aragatnaşyk, maglumat we tehnologiýa ugurlarynda alynyp baryljak ylmy-kämilleşdiriş işleriň çäginde taslama taýarlan, şol taslamalary TÜBİTAK arkaly hödürlän firmalar hem-de jemgyýetçilik guramalaryna beriljekdigini aýdandygy okyjy köpçüliginiň dykgatyna ýetirilýär.
