Türk metbugatynyň gysgaça mazmuny 20.07.2014
Dünýäniň we ýurduň gün tertibiniň ileri tutulýan ugurlary bilen bagly habarlar gündelik gazetlerde giň seslenme döredýär
“Ýeni Şafak” gazeti “Dartgynly üç gün” söz başyly habarynda Ysraýylyň iki hepdeden bäri gury ýerden we howa bombalaýan Gaza şäherinde şertleriň diýseň agyrlaşandygyny ýazýar. Şäherde elektrik togunyň we suwuň ýokdugy, derman ätiýajynyň azalandygy barasynda maglumat berýän ýolbaşçylaryň “şäherde iň dartgynly üç günüň başlandygyna” ünsi çekip, kömek sorandyklaryny okyjy köpçüliginiň dykgatyna ýetirýär.
“Milliýet” gazeti “Gazaly çagalar üçin hüjümleri bes ediň” söz başyly habarynda Ysraýylyň harby operasiýasynda 80-e golaý çaganyň ýogalandygyna ünsleri çekýär. Gazet halkara we palestin jemgyýetçilik guramalarynyň Gazada ýogalan çagalaryň sanynyň artýandygyna ünsleri çekip, hüjümleriň gyssagly bes edilmegini isländiklerini ýazýar.
“Haber Türk” gazeti “Ankaranyň hüjümleriň bes edilmegi barasyndaky meýilnamasy” söz başyly habarynda resmi Ankaranyň Gazadaky gyrgynçylygyň bes edilmegi we sebitde durnukly parahatçylygyň gazanylmagy üçin meýilnama taýarlandygyny okyjy köpçüliginiň dykgatyna ýetirýär. Gazet resmi Ankaranyň: Operasiýalaryň bes edilmegini, hüjümleriň bes edilmegini, Gaza goýlan çäklendirmäniň aýrylmagyny, ynsanperwer kömeginiň ýetirilmegi üçin portlardan biriniň, howa koridorynyň açylmagyny we Şalid çalşygyndaky 59 palestinalynyň boşadylmagyny teklip edendigini ýazýar.
“Hürriýet” gazeti “Soňky sapar nyşany” söz başyly habarynda 2007-nji ýylda prezidentlige saýlanandan soňky ilkinji daşary ýurt saparyny DKTR-na guran Abdulla Gülüň, meýilleşdirilen soňky daşary ýurt saparyny hem DKTR-na gurandygyna ünsleri çekýär. Gazet Prezident Güle DKTR-nyň Prezidenti Derwiş Erogly tarapyndan ýurduň iň abraýly nyşany bolan “Döwlet nyşanynyň” berilendigini mälim edýär.
“Watan” gazeti “Howa menzilleriniň arasyndaky gatnaşyklaryň artyşynda Ýewropada birinji” söz başyly habarynda transport, deňizçilik we aragatnaşyk ministri Lütfü Elwanyň Türkiýäniň awiasiýada dünýäniň esasy ýurtlarynyň hatarynda mynasyp orna eýe bolandygyny nygtap, 44 Ýewropa ýurdundaky 461 howa menzili baradaky habarnama laýyklykda Türkiýäniň 2004-2014-nji ýyllaryň aralygyndaky 10 ýyllyk döwürde howa menzili gatnaşygynyň artyşynda Ýewropada birinji ýeri eýeländigini aýdandygyny okyjylarynyň dykgatyna ýetirýär.
