Berdimuhamedowyň we Ruhaniniň arasynda telefon arkaly söhbetdeşlik

Düýn Türkmenistanyň Prezidenti Gurbanguly Berdimuhamedowyň we Eýran Yslam Respublikasynyň Prezidenti Hasan Ruhaniniň arasynda telefon arkaly söhbetdeşlik boldy.

Iki ýurduň Liderleri mähirli salamlaşyp, gözbaşyny asyrlaryň jümmüşinden alyp gaýdýan hoşniýetli türkmen-eýran gatnaşyklarynyň ýokary derejesini bellediler hem-de söwda-ykdysady, medeni –ynsanperwer we beýleki ulgamlarda özara bähbitli döwletara gatnaşyklaryň netijeli häsiýete eýedigini nygtadylar. Soňky ýyllarda şol gatnaşyklar dostlugyň we birek-birege sarpa goýmagyň esasynda işjeň ösdürilýär.

Prezidentler Gurbanguly Berdimuhamedow we Hasan Ruhani Oraza baýramy mynasybetli birek-biregi mähirli gutladylar hem-de türkmen we eýran halklaryna parahatçylyk, abadançylyk we rowaçlyk arzuw etdiler.

Telefon arkaly söhbetdeşligiň barşynda söhbetdeşler ozal gazanylan ikitaraplaýyn ylalaşyklary durmuşa geçirmek  hem-de ikitaraplaýyn we sebit möçberinde hyzmatdaşlygyň kuwwatynyň artýandygy babatda Türkmenistanyň hem-de Eýranyň arasyndaky hyzmatdaşlygyň ileri tutulýan ugurlaryna üns berdiler.

Iki dostlukly döwletiň Baştutanlary söhbetdeşligiň çäklerinde özara gyzyklanma bildirilýän halkara syýasatynyň möhüm meseleleriniň birnäçesine degip geçdiler. Söhbetdeşler möhüm halkara meseleleri, aýratyn hem parahatçylygy we durnukly ösüşi üpjün etmekde tagallalary birleşdirmäge degişli meseleler boýunça garaýyşlaryň birmeňzeşdigini belläp, bu ugurda netijeli gatnaşyklaryň ählumumy maksatlra hem-de milli bähbitlere laýyk gelýändigini nygtadylar.

Söhbetdeşligiň ahyrynda Prezidentler Gurbaguly Berdimuhamedow hem-de Hasan Ruhani  häzirki döwürde täze many-mazmuna eýe bolan türkmen-eýran hyzmatdaşlygynyň  geljekde çuňlaşdyryljakdygyna ynam bildirip, birek-birege hem-de iki ýurduň halklaryna iň gowy arzuwlaryny beýan etdiler.

Telefon arkaly söhbetdeşlik eýran tarapynyň başlangyjy boýunça geçirildi. (TDH)