Azerbaýjanyň, Russiýanyň we Ermenistanyň Daşary Işler Ministri Astanada Duşuşdy

Azerbaýjanyň Daşary işler ministri Jeýhun Baýramow, Russiýanyň Daşary işler ministri Sergeý Lawrow we Ermenistanyň Daşary işler ministri Ararat Mirzoýan, Gazagystanyň paýtagty Astanada üçtaraplaýyn maslahat geçirdi.

Russiýanyň Daşary işler ministrliginden berlen beýannama görä, Lawrow maslahatda, Azerbaýjan bilen Ermenistanyň arasynda aragatnaşyk liniýalarynyň açylmagy, parahatçylyk gepleşikleriniň depgininiň güýçlendirilmegi we iki ýurduň arasyndaky serhetleriň kesgitlenilmegi meselesiniň gün tertibinde esasy orun eýeleýändigini belledi.

Azerbaýjanyň Daşary işler ministrliginden berlen beýannama görä bolsa Baýramow, 2-nji oktýabrda Şweýsariýanyň Ženewa şäherinde Ermenistanly kärdeşi bilen geçiren duşuşygynda parahatçylyk şertnamasy hakynda ýörite taslama hödürländigini we Ermenistandan jogaba garaşýandyklaryny aýtdy.

Baýramow, Azerbaýjanyň Prezidenti Ilham Aliýew bilen Ermenistanyň Premýer-ministri Nikol Paşinýanyň, Fransiýanyň Prezidenti Emmanuel Makron we ÝB Geňeşiniň başlygy Çarles Mişel bilen 6-njy oktýabrda Pragada geçiren dörttaraplaýyn duşuşygynda, iki ýurduň birek-biregiň territorial bitewiligini we özygtyýarlygyny ykrar etmek we sarpa goýmak meselesinde ylalaşyk gazanylandygyny nygtady.

Ermenistanyň Daşary işler ministrliginden berlen beýannamada bolsa, Mirzoýanyň, iki ýurduň serhedinde täze çaknyşyklaryň başdan geçirilmezligi üçin serhetde halkara gözegçilik merkeziniň gurulmalydygyna ünsi çekendigi bellenildi.

Azerbaýjanyň, Russiýanyň we Ermenistanyň Daşary işler ministri üçtaraplaýyn maslahatyň dowam etdirilmegi meselesinde ylalaşyk gazandy.