Husileriň 2 Uçarmansyz Howa Ulagy Hatardan Çykaryldy

Ýemende hökümete goldaw berýän Saud Arabystanynyň öňbaşçylygyndaky hyzmatdaş güýçler husi partizanlara degişli ýene-de iki sany bombaly uçarmansyz howa ulagyny hatardan çykarandygyny beýan etdi.

Hyzmatdaş güýçleriň Saud Arabystanynyň resmi habarlar gullugy “SPA-da” çap edilen beýannamasynda Eýran tarapyndan goldanýan husileriň Saud Arabystanynyň günorta günbataryndaky Hamis Muşaýt etrabyna 2 sany uçarmansyz howa ulagyny ugradandygy mälim edildi.

Beýannamada Saud Arabystanynyň Harby howa güýçleriniň uçarmansyz howa ulaglaryny hatardan çykarandygy nygtalýar.

Hyzmatdaş güýçleriniň 27-nji iýunda beren beýannamasynda husilere degişli 2 sany ballistiki raketa bilen bomba ýüklenen uçarmansyz howa ulagynyň täsirsiz ýagdaýa getirilendigi mälim edilipdi.

Husileriň harby metbugat sekretary Ýahýa Seri Twitterden beren habarnamasynda Saud Arabystanynyň Najran, Abha we Hamis Muşaýt etraplaryndaky harby bazalara 5 sany ballistiki raketa we 5 sany uçarmansyz howa ulagy bilen hüjüm gurandyklaryny beýan etdi.

Ençeme wagtdan bari syýasy durnuksyzlygy başdan geçirýän Ýemende Eýran tarapyndan goldanýan husiler bilen hökümete tabynlykdaky güýçleriň arasynda çaknyşyklar dowam edýär.

Husiler 2014-nji ýylyň senýabr aýyndan bäri paýtagt Sananyň we käbir şäherlere gözegçilik edýän bolsa, Saud Arabystanynyň öňbaşçylygyndaky hyzmatdaş güýçler bolsa 2015-nji ýlyň mart aýyndan bäri husilere garşy Ýemeniň hökümetini goldaýar.

Eýran tarapyndan goldanýan husiler ýygy-ýygydan Saud Arabystanynyň günorta etraplaryna ballistiki raketalar we uçarmansyz howa ulaglary bilen hüjüm guraýar.