آوروپا بیرلیگی اؤلکه‌لرینده “اسپوتنیک” و “روسیا تودی”ین فعالیتی دایاندیریلیب
آوروپا بیرلیگی شوراسی روسیانین "روسیا تودی" (RT) و "اسپوتنیک" کانال‌لاری‌نین آوروپا بیرلیگی داخیلینده یاییمینی قاداغان ائدن قرارینی قوه‌یه میندیریب.
آوروپا بیرلیگی اؤلکه‌لرینده “اسپوتنیک” و “روسیا تودی”ین فعالیتی دایاندیریلیب
آوروپا بیرلیگی شوراسی روسیانین "روسیا تودی" (RT) و "اسپوتنیک" کانال‌لاری‌نین آوروپا بیرلیگی داخیلینده یاییمینی قاداغان ائدن قرارینی قوه‌یه میندیریب.
آوروپا شوراسی “روسیانین اوکراینایا هوجومو و آوروپا بیرلیگی علیهینه دزینفورماسیون ایله معلومات‌لارین مانیپولاسیونو " بیتنه قدر اینگیلیس، آلمان، فرانسیز و ایسپان دیل‌لری ده داخیل اولماقلا، روس مدیا قورولوش لارینین یاییمی‌نین قاداغان ائدیله‌‌جگینی آچیقلاییب.
قاداغا قراری آوروپا بیرلیگی-نین رسمی ژورنالیندا دا درج اولونوب. قراردا بو تشکیلات‌لارین کابلو، اویدو،آی پی تی وی" اینترنت خیدمت ساغلایجیلاری، اینترنت ویدئو پایلاشما پلاتفورما‌لاری و تطبیق‌لری ده داخیل اولماقلا هر جور مدیادا قاداغان ائدیلدیگی بیلدیریلیب.
شورانین بیاناتیندا بیلدیریلیر کی، “روسیا سیستم‌لی اولوسلار آراسی دزینفورماسیون کامپانیاسی آپاریر، قونشو اؤلکه‌لرله باغلی فاکت‌لاری تحریف ائدیر و بو اؤلکه‌لرده غیری-ثابت‌لیک یاراتماغا چالیشیر”.
روسیانین دزینفورماسیون و مانیپولاسیون سعی‌لری چرچیوه‌سینده خصوصیله سئچکی دؤورلرینده آوروپا-داکی سیاسی پارتیا‌لاری، وطنداش جمعیتینی، اتنیک آزلیق‌لاری، قاچقین‌لاری و دموکراتیک قوروم‌لاری هدفه آلدیغی بیلدیریلیب.
“آوروپا بیرلیگی اؤلکه‌لرینده روسیانین نظارتینده اولان مدیا قوروم‌لاری‌نین فعالیتی دایاندیریلیر”.
بونو ایسه آوروپا بیرلیگی‌نین خاریجی علاقه‌لر و تهلوکه‌سیزلیک سیاستی اوزره عالی نوماینده‌سی جوزف بورل توییتر صحیفه‌سینده یازیب.
“کرملین سیستم‌لی دزینفورماسیوندان اوکراینایا موداخیله‌سی اوچون آلت کیمی ایستیفاده ائدیر. اودور کی، بو مانیپولاسیونون قارشیسینی آلماق‌دان اؤترو بیز آوروپا بیرلیگی دؤولت‌لرینده “اسپوتنیک” و “روسیا تودی”ین فعالیتینی دایاندیریریق”، - او بیلدیریب.
جوزف بورل همچنین بیان ائدیب کی، قاداغان اولونموش روسیا مدیا نوماینده لرینین یاییمی تهلوکه‌سیزلیک و اجتماعی آساییش اوچون بیرباشا تهدیددیر.
داها اول RT-نین رئداکسیا رهبرلیگینه قارشی تحریم لر تطبیق ائتدیک‌لرینی خاطیرلا‌دان بورل قئید ائدیب کی، روسیا دؤولتی‌نین نظارتینده اولان مطبوعات تشکیلات‌لاری‌نین فعالیتینی هدفه آلماق آوروپا بیرلیگی اوچون ضروری‌دیر.
