ترامپ وتو ائتدی
"بو قانون لایحه‌سی، منیم آنایاسال نفوذومو ضعیفلتمک اوچون ائدیلن لزومسوز و تهلوکه‌لی بیر گیریشیمدیر"
آمریکا بیرلشمیش دؤولتلرینین پرزیدنتی دونالد ترامپ، اؤلکه‌سینین، یمن‌ده‌کی ساواش‌دا سعودی عربستان رهبرلیگین‌ده‌کی کوالیسیونا وئردیگی دستگی کسمه‌سینی نظرده توتان قانون لایحه‌سینی وتو ائتدی.
آغ ائو، آمریکا بیرلشمیش دؤولتلری پرزیدنتی ترامپین ایمضاسی ایله سنایا گؤندریله‌ن وتو مکتوبونو، یازی‌لی بیر آچیقلاما ایله بیلدیردی.
ترامپ، مکتوبون‌دا وتو سببینی،
"بو قانون لایحه‌سی، منیم آنایاسال نفوذومو ضعیفلتمک اوچون ائدیلن لزومسوز و تهلوکه‌لی بیر گیریشیمدیر، آمریکا وطنداشلارینین و حربی پرسنلینین حیاتینی تهلوکه‌یه آتیر. بو لایحه عینی زامان‌دا آمریکا خاریجی سیاستینه ده ضرر وئره بیلر" ایفاده‌سی ایله آچیقلادی.
آمریکا بیرلشمیش دؤولتلرینین یمن‌ده اولما سببینی، "یمن القاعده‌سینه قارشی موباریزه ائتمک" شکلین‌ده ایضاح ائد‌ن دونالد ترامپ، آمریکا بیرلشمیش دؤولتلرینین یمن‌ده‌کی دوشمن‌‌لیکلرین بیر طرفی اولمادیغینی ساووندو.
یمن‌ده سعودی رهبرلیگی آلتین‌داکی کوالیسیون ایچری‌سین‌ده و یا اونلارلا بیرلیک‌ده مختلیف یئر‌لرده وظیفه‌لی هئچ بیر آمریکا عسگرینین اولمادیغینی ایفاده ائد‌ن ترامپ، آمریکا بیرلشمیش دؤولتلرینین سعودی عربستانا دستک وئرمه‌سینین حاق‌لی سببلری اولدوغونو ادعا ائتدی.
آمریکا بیرلشمیش دؤولتلرینین یمن‌ده سعودی عربستانا وئردیگی دستگی کسمه‌سینی نظرده توتان قانون لایحه‌سی ۴ آوریل‌ده نماینده‌لر مجلسین‌ده ۱۷۵ه قارشی ۲۴۷ سسله، سنا‌دا ایسه ۱۳ مارس‌دا ۴۶یا قارشی ۵۴ سسله قبول ائدیلمیشدی.
سؤزوگئدن لایحه‌ده، القاعده ایله ساواشانلار خاریج، یمن‌ده‌کی ساواشا داخیل اولان، یا دا ساواشی ائتکیله‌ین بوتون آمریکا حربی گوج‌لرینین ۳۰ گون عرضین‌ده گئری چکیلمه‌سی نظرده توتولوردو.
وظیفه عرضین‌ده ایکینجی دفعه وئتو حقوقونو ایستیفاده ائد‌ن ترامپ، داها اول ده آمریکا بیرلشمیش دؤولتلری-مکزیک سرحدینه دیوار هؤرولمه‌سینی انگلله‌یه‌ن قانون لایحه‌سینی وتو ائتمیشدی.
