قازاخیستان-دان روسیا و اوکراینا-یا چاغیریش
توکایئو روسیا و اوکراینانی "دانیشیق ماساسی آرخاسیندا اورتاق دیل تاپماغا" چاغیریب
قازاخیستان پرزیدنتی قاسم جومرد توکایئو روسیا-اوکراینا محاربهسی سببیندن بولگه ده ژئو سیاسی وضعیتین گؤرونمهمیش درجهده پیسلشدیگینی بیان ائدهرک، روسیا و اوکراینانی "دانیشیق ماساسی آرخاسیندا اورتاق دیل تاپماغا" چاغیریب.
توکایئو حاکم آمانات (نور اوتان) پارتیاسینین پایتاخت نور سلطاندا کئچیریلن 22-جی فوق العاده عمومی ایجلاسیندا روسیا ایله اوکراینا آراسینداکی محاربهیه توخونوب.
محاربه سببیندن بولگه ده ژئوسیاسی وضعیتین گؤرونمهمیش شکیلده پیسلشدیگینی وورغولایان توکایئو بو پروبلئمین حلی ایله باغلی دانیشماغین واختینین چاتدیغینی بیلدیریب.
توکایئو "بیز هر ایکی دؤولتی دانیشیقلار ماساسی آرخاسیندا عمومی دیل تاپماغا چاغیریریق. لازیم گلرسه، واسیطه چی کیمی چیخیش ائتمهیه حاضیریق" دئییب.
روسیا و اوکراینا آراسینداکی وضعیتله باغلی قازاخیستانین موضعینه توخونان توکایئو اؤلکهسینین "اراضی بوتؤولوگو و اگمنلیگین" طرفداری اولدوغونو بیلدیریب.
توکایئو "بیز آوراسیانین تهلوکهسیزلیگینین بؤلونمزلیگی پرینسیپینده اصرار ائدیریک. من بونو فوریهنین 10-دا مسکوایا سفریم زامانی دا بیلدیردیم" دئییب.
بو آرادا، قازاخیستانین حاکم "نور اوتان" پارتیاسینین آدی دییشدیریلیب. پارتیانین یئنی آدی "آمانات" اولوب.
قئید ائدک کی، قازاخیستان پارلامئنتینین آشاغی پالاتاسینین ایسپیکئری یرلان کوشانوو قورولتایدا پارتیانین آدینین دییشدیریلمهسینی تکلیف ائدیب. پارتیانین باشقانی، دؤولت باشچیسی قاسم جومرد توکایئو بو تشببوسو دستکلهییب.