İke meñ täkä başı nigä kiräk bulğan?

Misırda firğawen Ramzes İkençeneñ ğıybadätxanäsendä 2 meñnän artıq mumiyälängän täkä başı belän zur qorılma tabıldı.  

Borınğı Misır patşalığınıñ bezneñ êrağa qadär 2686nçı-2181nçe yıllarda tarixi başqalası bulğan häm bügen Soxaç şähäre çikläre êçendä urnaşqan Abidosta Ramzes İkençe tözettergän xramda arxeologlar yaña açış yasadı. Qazınular näticäsendä tabılğan 2 meñnän artıq täkä başınıñ bezneñ êrağa qadär 332-30nçı yıllarda idarä itkän Ptolemey dinastiyäse çorına qarawı bilgele.  Bu qadär zur külämdä xaywan başınıñ nigä kiräk buluı turında törle farazlar bar. Alarnıñ ataw qorbanı buluı yäisä Ramzesnıñ ülemennän soñ meñ yıl buyı izgeläşterelüe uylanıla.  

Älege tabıldıqlar belän bergä bezneñ êrağa qadär 2345nçe-1821nçe yıllarda xakimlek itkän Altınçı dinastiyä çorına qarawçı üzençälekle häm tiñsez arxitektura ürnäge bulğan zur qorılma belän ğıybadätxanäne äyländerep alğan tön’yaq divarnıñ qayber öleşläre kön yözenä çığarıldı.

2020nçe yılda bu xramda başqa xaywannarnıñ söyäkläre häm skelet öleşläre tabılğan ide.