İstanbulda tatar räsem kürgäzmäse: “Pıyala aşa töslär”

14nçe iyül’dä İstanbulda Bäräkätzadä galereyasında Tatarstan rässamı Qamil Aqmanovnıñ “Pıyala aşa töslär”  (Colors through glass) şäxsi kürgäzmäse açıldı.

Tatarstan häm Rusiyä rässamnär berlege äğ’zase bulğan Aqmanovnıñ İstanbuldağı kürgäzmäsendä tösle sänğät’ pıyalasın êretep yabıştıru ısulı bulğan f’yuzing texnikası belän yasalğan äsärläre täq’dim itelä.

Şulay uq Qamil Aqmanovnıñ yaña äsärläre dä täq’dir itelä: ul koronavirus pandemiyası waqıtında çiklär yabılğaç dürt ay buyı İstanbulda qala häm şuşı waqıt êçendä ağaç skul’pturalar yasıy.

Kürgäzmä açılışında qatnaşqan Rusiyä Federaśiyäseneñ İstanbuldağı general’ konsullığı konsul-kiñäşçese Dmitriy Yevdokimov, tanılğan törek şağıyre häm publiśistı Ataol Bähramoğlu, tanılğan teatr aktyorı häm yazuçı Orhan Aydın, şulay uq törek sänğäte legendaları Bädri Baykam, Hikmät Batutçugil, Kadir Ablak, Taner Alakuş tatar rässamınıñ icatın yuğarı bäyäläde.

Başqortstannıñ Yañaul yaqlarında tuıp üskän Qamil äfände 1978nçe yılda Qazan arxitektura akademiyasın tämamlağannan soñ Tatarstannıñ Bögelmä şähärendä yäşi häm êşli. Üzeneñ icadi yulın 30 yıl êlek balçıqtan keçkenä şäkel skul’pturasınnan başlıy. Annan soñ f’yuzing (yuğarı temperaturadağı näfis pıyala êretü) êşenä kereşep, törle alımnarnı qullanıp qamillekkä ireşä.

Rässamnıñ êşläre Tatarstan däwlät muzeyı kollekśiyäsendä dä üz urının alğan.

Qamil Aqmanov 30dan artıq Rusiyä häm Tatarstan kürgäzmälärendä qatnaştı, 10nan artıq şäxsi kürgäzmä avtorı.

Kürgäzmäne 5nçe avgustqa qadär İstanbulnıñ Beyoğlu bistäsendäge Bäräkätzadäli sänğät galereyasında qararğa mömkin.

İstanbulda tatar rässamnäre | TRT Tatarça

 

Änkarada 3nçe Zamança sänğät yärminkäse | TRT Tatarça