İzraildä İstanbul kürgäzmäse

İstanbulda tuğan hӓm belem alğan Dr. Yosef Sibineñ tarixi İstanbul öylӓrennӓn toruçı kürgӓzmӓse İzrail başqalası Tel’ Avivdağı Törek mӓdӓniyӓt üzӓgendӓ açıldı.

Törkiyӓneñ İzraildӓge ilçelege hӓm İzraildӓge Törkiyӓlelӓr berlege urtaq rӓweştӓ oyıştırğan hӓm Sibi “Balaçaq xatirӓlӓre” dip atağan kürgӓzmӓse tarixi İstanbul öylӓreneñ modellӓrennӓn tora.

Kürgӓzmӓdӓ tarixi İstanbul öylӓre belӓn ber rӓttӓn olı yulbaşçı Ğazıy Mostafa Kemal Atatörek tuğan öy hӓm İstanbuldağı törle dinnӓrgӓ bӓyle ğibadӓtxanӓlӓrneñ modellӓre dӓ bar. Şul uq waqıtta tabip ta bulğan Sibineñ 90 tirӓse êşçӓnlege dӓ urın alğan kürgӓzmӓgӓ kilüçelӓr küp buldı.

Yosef Sibi açılışta yasağan çığışında kürgӓzmӓneñ yaratqan şӓhӓre İstanbul hӓm balaçağın çağıldıruın ӓytep, 35 yıldan artıq bu modellӓr östendӓ êşlӓwen assızıqladı. Sibi keşelӓrgӓ İstanbulnı kürep qaytırğa kiñӓş itüen ӓytep tübӓndӓgeçӓ dӓwam itte: “İstanbul - hӓrkemneñ şӓhӓre.”

Törkiyӓneñ Tel’ Avivdağı ilçelege rӓsmi zatı Tolga Budak ta bu kürgӓzmӓne Törkiyӓ belӓn İzrail arasındağı mӓdӓni bağlarğa basım yasaw maqsatı belӓn oyıştıruların belderde.

Kürgӓzmӓ pӓnceşӓmbe hӓm comğa könnӓrendӓ 3 ay buyı açıq bulaçaq.