NATOnıñ iñ zur xärbi künegüläre başlandı

NATOnıñ 1947nçe yıldan 1991gä qadär barğan “salqın suğış” çorınnan sonğı iñ zur xärbi künegüläre başlandı. Ul “Qaqşamas saqçı-2024” dip atala.  

İttifaq’tan belderülärençä, AQŞnıñ desant korabı “Ganston Xoll” Virjiniya ştatınnan quzğaldı. Ul berniçä operaśiyä başqarıp Atlantik okeannıñ ikençe yarına baraçaq. Bu ayda Kanadanıñ Yaña Şotlandiyä töbägennän “Şarlottawn” fregatınıñ da Awrupağa taba yözäçäge belderelde. Şulay itep, ittifaq köçlären Tön’yaq Amerikadan Atlantik ar’yağına küçerep Awrupa-Atlantik alanın nığıtu säläte kürsäteläçäk.

31 NATO äğ’zası häm kandidat däwlät Şveśiyädän yaqınça 90 meñ ğaskäri qatnaşaçaq künegülärneñ may axırına qadär däwam itäçäge belderelde.

Çaranıñ Germaniyä, Pol’şa häm Baltıyq illärendä uzuı häm Rusiyä belän bulırğa mömkin suğış sśenariyların üz êçenä aluı kötelä.

Moña qadär NATOnıñ “salqın suğış” çorınnan soñğı iñ zur xärbi künegüläre 1988nçe yılda bulğan häm 125 meñ keşe qatnaşqan "REFORGER" ide.