Lenarçiç: “Cirteträw tragediyası – Türkiyä belän mönäsäbätlärdä yaña säxifä açu öçen forsat”
Awrupa Berlege komissiyasınıñ humanitar yärdämnär häm krizis idaräsennän cawaplı äğ’zase Yanez Lenarçiç 6nçı fevral’däge Kahramanmaraş êpiśentrlı cirteträw tragediyasınıñ bigräk tä Türkiyä belän mönäsäbätlärdä yaña säxifä açu öçen forsat buluın äytte
Lenarçiç Awrupa parlamentınıñ üseş komitetındağı utırışta yasağan çığışında Awrupa Berlegeneñ Türkiyädäge cirteträwdän soñ böten çaralarnı mobilizaśiyäläwen belderep: "Böten qorallarıbıznı qullanırğa däwam itäçäkbez,” – dide.
"Bu yärdämneñ yaqın kiläçäktä Awrupa Berlegennän çittä dä däwam itüe häm tağın da kiñ qırlı xalıqara cämäğätçelekneñ yañadan tözekländerügä häm reabilizaśiyägä bulışlıq itüe kiräkle bulaçaq,” – dip äytüçe Lenarçiç: "Minemçä, şuşı zilzilä tragediyası ayıruça Türkiyä belän mönäsäbätlärebezdä yaña säxifä açu öçen forsat,” – dip bilgeläp uzdı.
Türkiyädä cirteträwdän täêsirlängän vilayätlärdäge iñ aşığıç ixtıyaclarnı qanäğätländerü öçen xäzergä qadär 8 million yevrodan kübräk humanitar yärdäm ayırıp quyuların belderüçe Lenarçiç: "Komissiyanıñ başqa bülekläre belän bergä östämä finanslaw êzlibez,” – dide.
Cirteträwdän soñğı berençe säğätlär êçendä 21 Awrupa Berlege äğ’zase il häm başqa Awrupa Berlege grajdan saqlaw mexanizmın qullanuçılarnıñ 30 êzläw-qotqaru törkeme häm 6 sälamätlek saqlaw törkemen cibärüen belderüçe Lenarçiç êzläw-qotqaru êşçänlegeneñ 17nçe fevral’dä tögällänüen, läkin sälamätlek saqlaw törkemnäreneñ äle dä cirlektä buluın äytte.
Lenarçiç monnan tış 18 Awrupa Berlege äğ’zase ilneñ toraq materialları, mediśina caylanmaları, aşamlıq, kiyım-salım kebek äyberlärne cibärüen, mondıy äyber külämeneñ 2 million 600 meñnän artuın citkerde.
