Ukrainada xärbi xälat iğ’lan itelde

Vladimir Zelenskiy, xalqına “Mömkin bulğança öydä qalığız” çaqıruın yasap, il külämendä xärbi xälat iğ’lan itelüen belderde.

Rusiyäneñ Ukrainağa qarata operaśiyası belän bäyle bularaq Zelenskiy: "Ägär canıbızğa, iregebezgä, balalarıbızğa höcüm itelsä, üzebezne saqlayaçaqbız, höcüm itmäyäçäkbez, üzebezne saqlayaçaqbız”, - dip äytte.

Ukraina liderı: "Rusiyä asqormabız belän çik buyı saqçılarıbızğa raketa höcümnären oyıştırdı. İlneñ şaqtıy şähärendä şartlawlar barlıqqa kilde”, - dip belderde.

Ukraina parlamentı da tön urtasında başlanğan ğadättän tış xäl qararın qabul itkän ide.

Ğadättän tış xäl qararnamäse 450 parlamentariydän 335eneñ yaqlawı belän qabul itelgän ide.

Qararnamägä kürä, ğadättän tış xäl 30 kön däwan itäçäk, kiräkle bulğan oçraqta isä tağın 30 köngä ozatıla alınaçaq.

İminlek häm saqlanu şurası başlığı Oleksiy Danilov parlamentta yasağan çığışında Rusiyä maxsus iminlek köçläreneñ häm separatistlarnıñ Ukrainağa qarşı êşçänlege arqasında däwlätneñ normal’ räweştä êşläwen garantiyäläw maqsatınnan çığıp bu qararnı qabul itü zaruriyäteneñ buluın beldergän ide.

Rusiyä İlbaşı Vladimir Putin Ukrainanıñ könçığışındağı Donbassta maxsus xärbi xäräkät başlatuların iğ’lan itkän ide.