"Omikron moñarçı kürelmägän tizlek belän tarala"

Bötendön’ya sälamätlek saqlaw oyışması koronavirusnıñ Omikron variantınıñ dön’yada moñarçı kürelmägän däräcädä taraluı xaqında kisätte. Anı yoqtıru oçraqları turında xäbärlär 77 ildän kilgän.

“Moña qadär ber genä mutaśiyädä dä kürelmägän tizlek belän tarala,”-di Bötendön’ya sälamätlek saqlaw oyışması ğomum mödire Tedros Adxanom Gebreyesus. Ul Omikron variantınıñ belderelgännän tağın da kübräk ildä buluın farazlıy.

“Omikron, başlıça, citdi awırtuğa säbäpçe bulmasa da, küp keşeneñ yoqtıruı äzerleksez sälamätlek saqlaw sistemasın qabat awır xälgä quya ala,”-dide Gebreyesus. Ul barı tik vakśinanıñ ğına krizistan çığunı täêmin itä almayaçağın, sośial’ ara, bitlek kiyü häm gigiyenanıñ ähämiyätle buluın belderde.   

Gebreyesus illär arasında Kovid-19 vakśinalaştıru kürsätkeçlärendä äle haman zur tigezsezlek küzätelüen assızıqlıy. 41 däwlät xalqınıñ 10%ın vakśinalaştırunı başqara almağan, 98 däwlät 40%qa citkermägän. Ber ük ildäge qatlamnar arasında da ähämiyätle tigezsezlek kürenä.