AQŞ armiyäse belän küzläw oyışması ber-bersen ğayepli
Alar Qabulda ğayepsez keşelärneñ ülemenä kitergän höcüm arqasında bäxäsläşä
AQŞ armiyäse häm küzläw oyışması Äfğanstannıñ başqalası Qabulda 10 grajdanlı hälaq bulğan höcüm mäs’äläsendä ber-bersen ğayepli.
Amerika üzäk quätlär komandirı Kennet Makkenzi 17nçe sentyabr’ comğa könne jurnalistlar qarşına çığıp 29nçı avgustta Qabuldağı höcümdä ber yärdäm oyışması maşinasın şartlatuların, 10 ğayepsez keşe, şul isäptän, 7 balanıñ ülüen beldergändä sizdermiçä genä küzläw oyışmasın ğayepläde.
CNNğa interv’yu birüçe AQŞ üzäk küzläw oyışması CİAğa yaqın çıanaqlar isä aq Toyota markalı maşinağa raketa cibärer aldınnan armiyäneñ grajdanlılar turında kisätelüen alğa sörde. Höcüm mäydanında tınıç xalıqnıñ häm maşinada balalarnıñ buluı aşığıç kodı belän xärbilärgä cibärelgän.
Küzläw oyılmasınnan CNNğa bu mäğ’lümat kitkännän soñ iğ’tibar Makkenzi belderülärenä taba yünälde. Ul höcümnän 48 säğat’ alda CİAdan ber öydä DEAŞ terrorçılarınıñ barlığı, alarnıñ aêroportqa raketa cibäräçäkläre xaqında xäbär aluların citkergän ide. Makkenzinıñ bu belderülärennän soñ küzläw oyışmasınnan armiyäne kisätüläre turında mäğ’lümatnıñ matbuğatqa sızuı armiyä belän CİA arasında bu höcüm belän bäyle kiyerenkelek tuuın kürsätä.
