Pol'şada vakśina cäncalı

Pol’şada 18 tanılğan keşe häm säyäsätçe, moña xaqları bulmağan kileş, berençe çirattağılar belän bergä vakśina yasatqan. Waqıyğa belän bäyle tikşerü bara.

10 meñ doza Pfizer/BioNTech vakśinası Pol’şağa 25nçe dekabr’ tönendä kilep ireşte. Anı yasatuda östenlek mediśina xezmätkärläre häm alarnıñ ğailälärenä birelä. Ämma äle alar vakśina qadatıp betergänçe ildäge populyar artist, cırçı häm televideniye alıp baruçıları da kergän 18 keşelek törkemneñ çiratsız älege prośeduranı uzuı açıqlandı. İsemlektä êlekkege xökümät räise Leşek Miller da bar. Bu xäbär xalıqnıñ rizasızlığın uyattı.

Älege törkem Varşava mediśina universitetında vakśina yasatqan. Xäbär taralğannan soñ, oyışmada 2020nçe yıl axırına qadär qullanılırğa tiyeşle preparatlar buluı turında belderdelär. Xastaxanädän citkerelgänçä, plannarnı bozıp härkemnän alda vakśina yasatqan 18 keşeneñ maqsatı - vakśinalaştıru kampaniyäsenä teläktäşlek kürsätü.

Cäncal 30nçı dekabr’dä êllekege xökümät räise Millernıñ vakśina yasatuı turında xastaxanädän birelgän dokumentnı sośial’ mediada urtaqlaşuınnan soñ çıqtı.

Xakimiyättäge Qanun häm ğadellek partiyäseneñ cirle idaräçelärdän qayberläreneñ dä mediśina xezmätkärlärennän alda vakśina yasatuı bilgele bulğan.

Pol’şa xökümäte räise Mateuş Moraveśki: “Qağıydälärne bozunıñ  legal’ säbäbe bula almıy. Bu çın cäncal,”-dip belderü yasadı. Xökümät süzçese  Piotr Müller da waqıyğanı tikşerülären citkerde. “Barlıq ğayeplelär tiz arada cäzaların alır dip ömetlänäm,”-dide ul.