Fälästin İzrail belän söyläşülärgä äzer
Bu xaqta Fälästin däwlät başlığı Mäxmüt Abbas Germaniyä kanślerına söyläde
Fälästin däwlät başlığı Mäxmüt Abbas ileneñ İzrail belän söyläşülärgä äzer buluın belderde. Ämma bu xalıqara legitimlıq nigezendä häm dürtle komissiyä küzätüe astında alıp barılaçaq.
Fälästin räsmi xäbär agentlığı WAFA citkergänçä, Mäxmüt Abbas Germaniyä kanślerı Angela Merkel’ belän telefon aşa söyläşte. Anda Fälästin kiderı İzrailneñ annekśiyä plannarı belän bäyle soñğı säyäsi üzgäreşlär xaqında Merkel’gä mäğ’lümat birde. Şunda ul söyläşülärgä äzer buluların da äytte.
Abbas Merkel’nı Germaniyäneñ BMO İminlek şurası häm Awrupa Berlege çor räise buluı belän qotladı. Ul monıñ xalıqara legitimlıq häm xoquqnı yaqlawğa, totrıqlılıqnı tormışqa aşıruğa öleş kertüen teläde.
Söyläşüdä Merkel’ ileneñ ike däwlätle çişeleş nigezendä tınıçlıqnı yaqlawçı häm xalıqara xoquqqa bäyle poziśiyäsen assızıqladı.
Kanśler ike yaqnıñ da söyläşü östälenä utıruınıñ ähämiyätenä iğ’tibarnı cälep itte.