Awrupada matçlar tamaşaçısız uynalaçaq

İtaliyädä koronavirustan ülüçelär sanı 631 buldı. Kiçä tağın 168 awırunıñ ğomere özelde. Bu ildä ber köndä bulğan iñ yuğarı ülem kürsätkeçe ide. İtaliyädä 22nçe martqa qadär barlıq uqu yortları yabıldı, däwlät teatrları da 31nçe martqa qadär êşlämi. Öylärendä karantinğa alınğan keşelärgä êlektron beläzeklär tağıldı. Alarnıñ tışqa çığuları şul räweşle kontrol’ iteläçäk.  

Awrupada kizüdän iñ zur zarar kürgän illärdän tağın berse - Franśiyä. Anda ülüçelär - 33, yoqtıru oçraqları - 1784. İldä 1nçe häm 2nçe futbol ligalarınıñ matçları 15nçe aprel’gä qadär tamaşaçısız uynalaçaq.

İspaniyädä bügengä qadär 35 keşeneñ ğomere özelde. Yoqtıru oçraqları - 1700gä citte. İldä parlament êşçänlegenä 1 atna tänäfes birelde. Sälamätlek saqlaw ministrı Sal’vador İlla futbol häm basketbol maçlarınıñ, barlıq xalıqara çaralarnıñ tamaşaçısız uynalaçağın citkerde. Bu matçlarğa canatarlar ğına tügel, jurnalistlar da kertelmäyäçäk digän süz.

Başqa Awrupa däwlätläre dä sport matçlarında tamaşaçı bulmayacağın xäbär itte. Kübesendä uqular tuqtatıldı.

Germaniyädä 2 keşeneñ ğomere özelde, 1296 keşe xastalandı. Kanśler Angela Merkel’ ildä koronavirusnıñ ozaq waqıtqa suzılaçağın belderde. “Germaniyädäge keşelärneñ 60-70%ına virus yoğarğa mömkin,”-dide ul.

AQŞta N’yu-Yorktan soñ düşämbe könne N’yu-Djersida da ğadättän tış xäl iğ’lan itelgän ide. Ştatta Kovid-19dan berençe ülem oçrağı terkälde. İldä, soñğı mäğ’lümatlarğa qarağanda, kimendä 27 keşeneñ ğomere özelde, 700dän artığı çirli.