Angliyädä rasaçıl höcüm

Angliyäneñ Xaddersfild şähärendä yäşäwçe Cämal isemle 15 yäş’lek süriyäle malay rasaçıl höcümgä tarıdı. Bu waqıyğa bik küp keşeneñ tänqıytenä duçar buldı. Sośial’ mediada älege höcümneñ videosın millionlağan keşe qaradı.

Waqıyğa 25nçe oktyabr’dä bulğan. Cämalğa ber ük mäktäptä uquçı iptäşe höcüm itä. Videoda kürengänçä möhacirlärneñ ulın 16 yäş’lek başqa bala cirgä yığa häm awızına mäcbüri räweştä su ağıza.

Cämal häm ğailäsenä yärdäm itü öçen açılğan ber internet säxifäse arqılı 24 säğat’tä 115 meñ sterlingtan artıq xäyriyä aqçası cıyıldı.

Rasaçıl köç qullanularğa rizasızlıq däwam itkän arada şundıy uq höcümgä Cämalnıñ señleseneñ dä duçar buluı açıqlandı. Bu internet säxifäsendäge videoda açıq kürenä. Höcümçelär qıznıñ yawlığın saldırırğa mataşa.

Cämalnıñ ğailäse balalarınıñ daimi räweştä höcümgä duçar buluı säbäple şähärdän küçenergä uylıy.

Angliyädä näfrät cinayät’lären küzätep baruçı Tell Mama oyışmasınıñ mäğ’lümatlarına qarağanda, 2017nçe yılda mondıy tördäge 1200dän artıq höcüm bulğan.