İndoneziyada ülüçelär sanı arta

İndoneziyanıñ könçığışındağı Lombok utrawında 7 däräcä zurlığında cir teträwdä ülüçe sanı 91gä citte. Bu xaqta tabiğıy afätlär belän idarä itü agentlığınnan belderdelär.

Lombok utrawınıñ tön’yağı, könçığışı häm Mataram şähäreneñ cir teträwdän iñ nıq täêsirlängän cirlär. Qorbannarnıñ kübese yortları işelgännän soñ cimereklär astında qalıp ülde. Lomboknıñ tön’yağında ğomere özelüçelär ayıruça küp. Yaralılar da anda 300gä yaqın.

Gili utrawlarınnan meñ keşene êvakuaśiyälädelär. Aralarında cirle xalıq häm turistlar bar. Alar yanına mediśina xezmätkärläre kiterelde. Şulay uq, imin urınnarğa küçerelgän keşelärne odeal, çatır häm azıq-tölek şikelle berençel ixtıyaclar belän täêmin itärgä tırışalar.

İndoneziya däwlät başlığı  Djoko Vidodo da cir teträw hälakäte belän bäyle qayğıların belderde. Ul wäqalätle barlıq berämleklärgä töbäktäge êşçänlekne iñ yaxşı räweştä alıp barırğa çaqırdı.  

Cir teträw waqıtında Avstraliya êçke êşlär ministrı Peter Dutton da anda ide. Ul terrorçılıq belän köräşü konferenśiyäse öçen Lombok utrawlarına kitkän. Cir teträw başlanğanda ministr qunaqxanäneñ 12nçe qatındağı restoranda bulğan. Peter Dutton isän qotılularınıñ zur bäxet buluın belderde.