Amerikan wäkillege Myanma häm Bangladeşta

Amerika Quşma Ştatları Dӓwlӓt departamentınıň Xalıq sanı, qaçaqlar hӓm migraŝiyadan cawaplı kiňӓşçe wӓkile Simon Henşou yanındağı wӓkillek belӓn Myanma hӓm Bangladeşka sӓfӓr yasap, Arakanlı möselmannar belӓn bӓyle krizis mӓs’ӓlӓsendӓ söylӓşülӓr ütkӓrӓçӓk.

AQŞ Dӓwlӓt departamentınnan mӓs’ӓlӓ belӓn bӓyle yasalğan yazulı açıqlawda wӓkillekneň 29nçı üktӓbr’-4nçe noyabr’ könnӓrendӓ bu ike ildӓ söylӓşülӓrdӓ qatnaşaçağı belderelgӓn.

Wӓkillekneň ike ildӓge söylӓşülӓrendӓ Arakanlı möselmannar krizisı, humanitar yӓrdӓmnӓrneň ixtıyac toyıluçı töbӓklӓrgӓ ireşterelüe mӓs’ӓlӓse hӓm migraŝiya küzӓtelüçe töbӓklӓrdӓge soňğı wazğiyӓt’ne qarayaçağı açıqlanğan.

Açıqlawda Henşou liderlığındağı wӓkillekneň Myanma hӓm Bangladeşta yuğarı dӓrӓcӓle rӓsmi söylӓşülӓr ütkӓrӓçӓge, ayıruça Bangladeşnıň Koks Bazar şӓhӓrenӓ dӓ barıp, Roxing’yadan monda küçep kilergӓ mӓcbür qalğan arakanlılarnıň wazğiyӓte belӓn bӓyle söylӓşülӓrdӓ qatnaşaçağı citkerelgӓn.

Myanma armiyase Arakanda tınıç xalıqqa qarata oyıştırğan höcümnӓrdӓ 25nçe avgust könennӓn bügengӓ qadӓr meňnӓrçӓ möselman yaqtı dönyadan kitkӓn. Myanma citӓkçelegeneň töbӓkkӓ kerep çığularnı tıyuı arqasında ğomere özelgӓn keşe sanı bilgesez.

Êtnik çistartuğa ӓylӓngӓn höcümnӓrdӓ 300 tirӓse awıl armiya hӓm fanatik buddistlar tarafınnan yuqqa çığarılğan, 600 meňnӓn artıq arakanlı möselman tawlı töbӓklӓr, yılğa yӓisӓ diňgez aşa Bangladeşka qaçqan.