Rusiyä Tacikstan çigen saqlayaçaq
Rusiyä İlbaşı Putin Tacikstan çigen saqlawda bu ildäge Rusiyä xärbi bazası mömkinlekläreneñ qullanılaçağın beldergän
Rusiyä Federaśiyäse Däwlät başlığı Vladimir Putin Tacikstan-Äfğanstan çigen saqlaw öçen Tacikstanda urnaşqan Rusiyä xärbi bazasınıñ qullanıluı mäs’äläsendä kileşügä ireşelüen beldergän.
Räsmi säfär belän kitkän Duşanbedä Tacikstan İlbaşı İmamali Raxman belän küreşep söyläşüennän soñ oyıştırılğan urtaq matbuğat oçraşuında çığış yasawçı Putin Äfganstanda “DEAŞ” belän ber rättän başqa terror häm cinayätçel törkemnärneñ cäyelüennän borçıluların belderep: "Şuña kürä Tacikstan-Äfğanstan çigeneñ saqlanuı öçen Tacikstanda urnaşqan Rusiyä bazası mömkinlekläreneñ qullanıluı mäs’äläsendä kileşügä ireştek”, - dip äytkän.
Vladimir Putin säfäre waqıtında Tacikstan İlbaşı Raxmanğa ike il mönäsäbätlärenä öleş kertüe uñayınnan Rusiyäneñ “Aleksandr Nevskiy” däwlät ordenın da tapşırğan.
Kreml’neñ matbuğat üzägennän yasalğan belderüdä isä Putinnıñ säfäre qısalarında ike il arasında iqtisad, säwdä, ênergetika häm mağärif kebek ölkälärdä 7 kileşügä imza salınuı äytelgän.
