Ğaräp Berlege xalıqara cämäğatçelekne ğayeplägän
Berlek mäs'älä belän bäyle yazulı açıqlaw yasağan
Ğaräp Berlege İzrail törmälärendä utıruçı Fälästinle totqınnarğa qarata kürsätelüçe wäxşilärçä totışqa tawış-tınsız qaluçı xalıqara cämäğatçelekne ğayeplägän.
Berlektän yasalğan yazulı açıqlawda: “İzrail törmäläre belän şähärçeklärdä Fälästin keşelärenä belä torıp, meditsina yärdämeneñ kürsätelmäwen häm barlıqqa kilgän tragedik wazğiyätlärne yaqınnan tikşerer öçen wäkillek cibärmäwçe xalıqara cämäğatçelekne ğayeplibez,” – dip äytelgän.
Fälästin äsirläre häm irekkä cibärelgännär komissiyase xisabında urın alğan açıqlawda İzrail törmälärendä awır şartlar astında kön kürüçe 20ese xatın-qız, 230ı bala-çağa, 180e awır xäldä bulğan häm, kim digändä, mene xasta bulğan barlığı 6 meñ 500dän artıq Fälästinle totqınnıñ buluı belderelgän.
Sannarınıñ könnän-kön artuı arqasında Fälästinle totqınnarnıñ azıq-tölek, qışqı kiyem-salım häm daru qıtlığı kürüläre citkerelgän xisapta: “Yawlaw, äsirlärneñ tuğannarı beläñ küreşä almawı, politsiya etläre belän tönge basıp alular, awırularnı meditsina xezmätennän mäxrüm itü kebek ber törkem ğamällär başqarıla,” – dip äytelgän.
İzrail soñğı yıllarda xökemgä tartmıyça aralarında elekke ministr häm xalıq ışanıçlıları da bulğan 65tän artıq säyäsine saq astına aluı da belderelgän xisapta älege ğamällärneñ xalıqara xoquqqa, demokratiya, äxlaq häm keşelekkä qarşı buluı citkerelä.
