Belem ofığı 37

 Bügenge yazmabıznı polyak şaqire häm yazuçı Stanislaw Yeji Letsnıň “ Çığanaqqa ireşü öçen ağımğa qarşı yözärgä kiräk” digän süzläre belän başlap cibäräbez. Belem-ğıylemneň çığanağına ireşü öçen bar köçebezgä tırışu kiräklegen barıbız da belä älbättä. Uzğan yazmabızda Törkiyä başqalası Änkarada urnaşqan Törek aviatsiya oyşması universitetı belän tanıştırğan idek.Älege uqu yortınıň rektorı professor doktor Ünsal Bal belän äňgämäbezne däwam itteräbez.

Törek aviatsiya oyışması universitetı rektorınnan uqu yortındağı sotsial mömkinleklär häm stipendiyälär xaqında mäğlümat birüen sorıybız.

“Barlıq universitetlardağı stipendiyälärneň barısı da diyärlek bezneň uqu yortında da bar. Yaxşı uquçılarğa häm moňa östäp bik küp törle başqa stipendiyälär biräbez. İň başta küp kenä studentnı qızıqsındırğan ber sorawğa cawap birik. Ägär ber student bezneň universitetqa stipendiyäle itep qabul itelgän ikän, bu uqu yortın tämamlağanğa qadär stipendiyäse däwam itä. Yäğni imtixannarın waqıtında tapşıra almıyça, uqu yılı suzılsa da student barıber stipendiya ala.
Törek aviatsiya oyışması universitetınıň tarix buyınça däwam itkän cawaplılığı bar. Çönki bu uqu yortı -“Kiläçäk-küklärdäder” dip äytüçe Mostafa Kämal Atatörek qorğan oyışma. Şuňa kürä dä şähit häm ğazi balalarına qarata bik zur cawaplılıq toyabız. Bu bäyläneştä dä Törek aviatsiya oyışması universitetına uqırğa kilüçe şähit yäisä ğazıylarnıň balalarına stipendiyälär birelä”.

Mäs’älägä xalıqara studentlar küzlegennän çığıp, rektorğa xalıqara uquçı yäşlär nigä Törek aviatsiya oyışması universitetın saylarğa tiyeş dip sorıybız.

 ”Uquçı yäşlär bezgä şunıň öçen kilsen: çönki bezneň uqu yortı bu töbäktäge berdänber aviatsiya häm ğaläm belemnäre universitetı. Yaqın Könçığış, Balkan, Mäskäw, Kiyev, Germaniya , Afrikağa küz salğanda barı tik beränber bu yünäleştäge uqu yortı buluın küräbez. Ul da Törek aviatsiya oyışması universitetı. Barı tik bu üzençälek tä uquçı yäşlärebezneň biregä kilüe öçen citärle. Uzğan tapşıruda 1925 nçe yıldan birle däwam itüçe fizik häm intellektual täcribälärebez xaqında da aňlatqan idem. 4 hawa mäydanı, 80 nän kübräk oçqıçıbıznıň buluı da bezgä ayırım ber üzençälek östi.”

Uquçı yäşlär yuğarı uqu yortında belem alu öçen nigä Änkaranı saylasınnar ?

 “Änkara- universitetlar şähäre. Xäzerge waqıtta biredä 17 universitet bar häm bu san tağın da arta. Älege uqu yortlarındağı studentlar sanına küz salğanda biredä iskitkeç ber cämğiyät buluın häm östäwenä här ildän ber watandaş buluın küräsez. Bu isä üz çiratında Änkarağa kilgän ber studentnıň biredä yalğız qalmayaçağın , yäğni üz ilennän berniçä watandaş tabaçağın, alar belän bergä bulaçağın kürsätä.
Uquçı yäşlär öçen tağın ber möhim mäs’älä – alarnıň matdi xäle. Bu küzlektän çığıp qarağanda Änkara-Törkiyäneň iň arzan şähärlärennän berse. Bu mömkinlektän dä faydalanu zarur.
Änkarağa kilü öçen säbäplär bik küp. Cömhüriyät monda tözelgän. Şähärdä tarixi äsärlär şaqtıy. Turistik säyäxätkä çığarğa teläsälär Nävşähir Kapadokyağa bik caylı bara alalar. Telägän waqıtta diňgezgä kitärgä mömkin. Tabiğät moğcizası bulğan urınnarıbız küp.Änkara näq menä studentlar şähäre.”

Xalıqara studentlarnı biregä çaqırırğa teläsägez, nilär äyter idegez?

“Bu universitetta bügenge köndä 97 ildän kilgän uquçı yäşlär belem ala. 97 il keşese Änkaranı häm bu uqu yortın saylağan ikän , älbättä monıň möhim säbäpläre bardır. Bez çit illärdän kilgän studentlarıbızğa nigä bu universitetnı sayladığız dip sorağanda “Bez kütärelü öçen äzer “dip cawap birdelär. Bez dä kütärelergä äzer bulğan yäşlärebezne Törek aviatsiya oyışması universitetına kötep qalabız”.