د ترکیې  او امریکا ترمنځه د شوي توافق په اړه مثبت غبرګونونه دوام لري.

د ملګروملتونو  سرمنشي  انتونیو ګوتریس  د ترکیې او امریکا ترمنځه د سوریې د شمال په اړه  د شوي توافق په اړه ویلي دي چې  په سیمه کې د تاوتریخوالي د کچې د راټیټولو او د ملکي وګړو د خوندیتوب په خاطر  د هر ډول  هلو ځلو نه  هر کلی کوو.

د شمالي قبرس ترکي جمهوریت لومړي وزیر ایرسین تاتار بیا ویلي دي چې  « پدې پوره باور لرو چې دې نقطې ته د ترکیې  د عظیمې او کلکې ارادې  په نتیجه کې رارسیدلي یو. زمونږ  یواځنۍ هیله سیمه د ترهګرو سازمانونو نه  تصفیه  کیدل  او په ترکیه کې د امن فضا رامنځته کیدل دي. »

همداشان د شمالي قبرس ترکي جمهوریت د لومړي وزیر مرستیال او بهرنیو چارو وزیر قدرت اوزر سای  بیا د خپل ټویټر پاڼې له لارې په خپور کړي  پیغام کې ویلي دي چې  د ترکیې  عظیمې او قوي ارادې  بالاخره  نتیجه ورکړه. په سیمه کې  د قوي دریځ له برکته  سوله حاکمه شوه. انشاالله چې ددینه وروسته  په ټولو ژمنو  عمل وشي.

همداشان  د امریکا جمهوریت پلوي سناتور  جیمز ریچ  د ترکیې او امریکا ترمنځه د شوي توافق نه  د ټولو خواوو لپاره د خوښۍ  نه ډک  یو توافق په توګه یادونه کړې ده  او ویلي دي چې هره خوا باید  خوښ شي.

د ترکیې د بهرنیو چارو وزیر مولود چاوش اوغلو بیا  ویلي دي چې  پرون د امریکا مرستیال ولسمشر مایک پنس په مشرۍ  امریکايي هيئت  په انقره کې  د غونډو نه وروسته  د سوریې په شمال کې  د سولې چینې پوځي عملیات  د ۱۲۰ ساعتونو  یا پنځو ورځو لپاره  ودرول شول.