د تركيې نوى پرمختللى ټانك

د پارس په نامه د ټانكونو دا ماډل چې ۸ ټايرونه يې په يو ځل د حركت قابليت لري كولاى شي چې د جګړې په ميدان كې په ساعت كې د ۱۰۰ كيلومترو واټن ته ورسيږي. د پارس په نامه ټانك چې د ۳۰ زره كيلوګرامو پورې وزن لري د ۶۰ سلنې په اندازه لوړې چړايي باندې د ختلو وړتيا لري. همداراز د ۷۰ سانتي مترو پورې د لوړ مانع او د ۲ مترو په ژوروالي سره د كندې نه  تېرېدلو وړتيا لري.

د پارس ټانك همدا راز په شاتينۍ برخه كې د اوبو دوه جټ ماشينونه هم لري چې پ اوبو كې په ساعت كې د ۸ كيلومترو سرعت سره حركت كوي.

د چاودنې پر وړاندې مقاومت

ددې پارس په نامه د ټانكونو ترټولو مهمه ځانګړتيا د ماينونو او چاودنو پر وړاندې ځانګړى مقاومت دى. د ټانك د تېلو ټانكۍ د ځانګړو زغروالو موادو په واسطه ساتل كيږي او د ټايرونه يې داسې ډيزاين شوي دي چې د چاودنې وروسته هم د حركت قابليت لري.  په موټر كې دننه  د پرسونل لپاره داسې سيټونه هم لري چې د چاودنې پر مهال د پرسونل ساتنه كوي.

صادرات

دا ټانكونه نه يواځې د تركيې لخوا بلكې د نړۍ د نورو هېوادونو د اوردوګانو لخوا هم كارول كيږي. پدې وروستيو كې د مالېزيا اوردو د همدې ټانكونو د اخيستلو په موخه د تركي چارواكو سره تړون لاسليك كړى دى.