د سریلانکا  نوي  ولسمشر  ګوتابایا راجاپاکسا خپله لنډ مهاله  کابینه  اعلان کړه.

هغه  خپل  ورور د سریلانکا  پخوانی ولسمشر ماهیندا راجاپاکسا  د لومړي وزیر په توګه  وټاکه.

د سریلانکا  ولسمشر د لنډ مهاله کابینې د اعلانولو نه وروسته  وویل چې  د هیواد د اساسي قانون  له مخې  هر څه  ژر به  پارلماني ټاکنې ترسره کړي.

د ویلو ده چې  د سریلانکا د پارلمان کاري موده  د اګست په میاشت کې پایته رسیږي  خو  د دې هیواد  اساسي قانون  ولسمشر ته  د مارچ په میاشت کې د پارلمان د فسخه کولو او له سره د ټاکنو د ترسره کولو صلاحیت ورکړی دی.

د سریلانکا نوی  ولسمشر چې متقاعد  پوځي  دی  د خپل مشر ورور  مهیندا د ولسمشرۍ په موده کې  د ۲۰۰۵ او ۲۰۱۵ کلونو ترمنځه  د دفاع د وزیر په توګه دنده ترسره کړې.

هغه  په ځانګړې توګه په ۲۰۰۹ کال کې  په هیواد کې د خونړیو کورنیو جګړو پر مهال د بشري حقونو په تیریو، د صحرايي محاکمو او فاعل مجهول  جنایتونو کې په رول  لرولو  تورن شوی وو.