په لندن کې جومات ته د یو شکمن وسله وال د ننوتو مخه ونیول شوه

د لندن نه د ترلاسه شوو معلوماتو له مخې  تیره شپه په ځايي وخت په لسو بجو او ۴۵ دقیقو  د لندن  ایلفورد  په سیمه کې  یو تن  چې  مخ يي  پټ وو او په وسلې هم  سمبال وو  د سون ګینګ جامع جومات ته د ننوتو هڅه کړې وه چې د مقتدویانو لخوا يي مخه نیول شوې وه.

پولیسو د پيښې په اړه د راپور د ترلاسه کولو نه سمدلاسه وروسته سیمې ته راورسید  او د جومات  امنیت يي  ټینګ کړ.

پیښه  د تراویح د لمانځه پر مهال  رامنځته شوې ده. ویل کیږي  نوموړي  شکمن  مخ پټي کس  چې کله  جومات ته د ننوتو هڅه کوله  پدې وخت کې  د یو ډز غږ هم اوریدل شوی دی.

د لندن  پولیسو په سیمه کې د پلټنو  نه وروسته  د ټولنیزې مډیا له لارې  د سیمې خلکو ته معلومات ورکړل.

د لندن پولیسو ویلي دي  ګمان کیږي  د شکمن کس لخوا کارول شوي  وسله اصلي نوه. په پیښه کې هیچا ته هیڅډول زیان ندی اوښتی. پيښه  د ترهګرۍ سره هم  کوم تړاو نلري.

پولیسو ویلي دي چې  شکمن کس  د پيښې د ځای نه  په تیښته بریالی شوی دی چې د نیولو په خاطر يي چارې پیل شوي دي. پولیسو ویلي دي چې د جومات امنیت يي ټینګ کړی دی  او په پام کې لري چې د یو څه مودې لپاره په سیمه کې پاتې شي.

د ویلو ده  چې  یو څه موده مخکې  په نوي زیلاند  کې  د جمعې د لمانځه پر مهال په دوو جوماتونو د جمعې د لمانځه پر مهال  وسله وال بریدونه وشول چې په پایله کې  ۵۱ تنه مړه او  ۵۰ تنه نور ټپيان شول.

ددې پيښې نه وروسته  په انګلستان کې  مسلمانانو د ځان او جوماتونو د امنیت ساتلو په خاطر  د لا زیاتو امنیتي تدابیرو د نیول کیدو غوښتنه کړې وه.

د ویلو ده چې د نوي زیلاند بریدونو نه وروسته  په انګلستان کې هم  د برمنګهم  په ښار کې په ۶ جوماتونو  او نیوکاسټل په ښار کې په یو اسلامي تعلیمي مرکز  بریدونه شوي وو. پدې بریدونو کې یواځې جوماتونو او تعلیمي مرکز ته  مالي زیان اوښتی وو.

په انګلستان کې د تل ماما  په نامه  یوې مدني  ټولنې ویلي دي چې د نوي زیلاند  د پیښې نه وروسته په انګلستان کې هم  اسلام فوبیا او پر مسلمانانو  د بریدونو کچه لوړه شوې ده.