په اورکزیو ایجنسۍ کې په امنیتي ځواکونو وسله وال برید

د پاکستان  په  اورکزيو ایجنسۍ کې  طالبانو  په امنیتي ځواکونو  چې په عملیاتو بوخت  ول  وسله وال برید وکړ.

د سیمې نه د ترلاسه شوو معلوماتو له مخې پیښه  د اورکزیو ایجنسۍ  د عثمان خیل په سیمه کې رامنځته شوې ده .

د پاکستان د خبري رسنیو د خبر له مخې  پاکستاني ځواکونه  په سیمه کې په عملیاتو بوخت ول چې  په ناڅاپي ډول پرې برید وشو.

د برید نه وروسته نښته پیل شوه. په نښته کې  د پاکستاني طالبانو د تحریک طالبان پاکستان  یو تن نامتو قومندان شاه دوران  او ۴ تنه  اورپکي  ووژل شول.

ویل کیږي  پدې برید کې  یو تن پاکستاني افسر او یو تن پوځي هم  ژوند د لاسه ورکړی دی.

د یادولو وړ ده چې  د اورکزیو  ایجنسي  سیمه  د پاکستان  د ۷ قبایلي سیمو نه یوه  ده  چې تر ټولو  ډیر پکې  طالبان  او القاعدې ترهګره ډله  پیاوړې ده .