په پاکستان کې د کښتۍ جوړولو په فابریکه کې اورلګیدنې په لسګونو تنو ته مرګ ژوبله اړولې

د پاکستان د کراچۍ  په ښار کې  د ګډاني په سیمه کې  د کښتیو په یوې فابریکه کې  په یوې  ټانکر کښتۍ کې  د چاودنو نه وروسته  اورلګیدنه رامنځته شوه.

د لومړنیو معلوماتو له مخې پدې پیښه کې  ۱۸ تنه مړه او لسګونو تنه نور ټپیان شوي دي.

د ترلاسه شوو معلوماتو له مخې  د ګډاني په سیمه کې  د کښتیو په یوې فابریکه کې  په یوې خرابې ټانکر کښتۍ  کې  لومړی  چاودنه وشوه او وروسته اور لګیدنه رامنځته شوه.

په کښتۍ کې  د ۸ چاودنو غږونه اوریدل شوي دي. د بله پلوه ویل کیږي  چې د ټانکر کښتۍ په ټانکي کې د تیلو د شتون له امله  اور لګیدنه رامنځته شوې ده .

د پیښې نه سمدلاسه وروسته په لسګونو اور وړونکې او ژغورنې ډلې سیمې ته رسیدلي دي.

د کراچۍ  د پولیسو یو تن مشر خبري رسنیو ته ویلي دي چې  د کښتۍ په ټانکۍ کې  د تیلو او چاودنو له امله  د اور وژنې چارې د خنډ سره مخامخ  دي.

هغه ویلي دي چې د اور د قابو کولو هڅې دوام لري. هغه ویلي دي چې  د پیښې پر مهال په لسګونو تنه  کارګرانو پدې کښتۍ کې کار کولو. هغه ویلي دي که چیرې  دا اور قابو نشي  نور  نورو کښتیو ته به هم  د اور لمبې وغځیږي.

همداشان د پاکستان خبري رسنیو د عینې شاهدانو له قوله ویلي دي چې د پیښې پر مهال  څه باندې  سل تنه  کارګرو هلته شتون درلود. د چاودنو  له امله یو زیات شمیر کارګرانو د ځانونو د خوندي کولو په خاطر  سمندر ته ځانونه ګوزار کړي دي.

د پاکستان د ډان نیوز  ویلي دي چې  پیښه  په کښتۍ کې د ولډنګ پر مهال  رامنځته شوې ده .