د افغانستان په شمال کې د جوزجان په ولایت کې  پر افغان ځواکونو  خونړی برید شوی دی.

د جوزجان  ولایت د والي ویاند عبدالمعروف آذر  خبري رسنیو ته ویلي دي چې طالبانو  نن  د سهار  د ۳ بجو او ۳۰ دقیقو په شاوخوا کې  د شپې د تورتم نه په ګټې پورته کولو سره  د اقچې ولسوالۍ د حیدرآباد په کلي کې  د امنیتي ځواکونو په هډې  ډله اییز برید کړی دی.

هغه ویلي دي چې ددې برید په نتیجه کې  ۱۴ تنو سرتیرو ژوند د لاسه ورکړی دی او پنځه تنه  نور ټپيان شوي دي.

هغه زیاته کړې ده چې  پدې برید کې  ۲ تنه امنیتي سرتیري  لا درکه شوي دي چې  برخلیک يي ناڅرګنده  دی.

د هغه په وینا  پدې برید  او نښته کې  ۷ تنه طالب اورپکي وژل شوي  او ۳ تنه نور ټپیان شوي دي.

د برید مسئولیت  طالبانو په غاړه اخیستی دی.

د ویلو ده چې  طالبانو  پرون  شپه  په تخار ولایت کې د خواجه بهاوالدین په ولسوالۍ کې د اربکیانو په قرارګاه  ډله اییز برید کړی وو چې په نتیجه کې ۱۷ تنه اربکیان  په قتل رسولي وو.